Þarf að greiða gjöld af Cruiser

Yfirskattanefnd (YSKN) staðfesti úrskurð Ríkisskattstjóra um að ekki skuli fella niður bifreiðagjöld af gömlum Toyota Land Cruiser. Deilt var um aldur bifreiðarinnar.

Í lögum er kveðið á um að ekki skuli greiða bifreiðagjöld af bifreiðum 25 ára eða eldri. Eigandi bifreiðarinnar sagði að hún væri árgerð 1993 en þá var hún fyrst skráð á götuna. Í bókum Samgöngustofu var hún hins vegar skráð árgerð 1994.

YSKN taldi ekki forsendur til annars en að byggja á skráningu Samgöngustofu. Kröfu um niðurfellingu gjaldsins var því hafnað.