Vissi af máli árið 2014 en gerði ekkert

Prestur í Reykjavíkurprófastsdæmi skýrði Agnesi M. Sigurðardóttur, biskupi Íslands, fyrir fjórum árum frá atviki milli sín og Ólafs Jóhannssonar, sóknarprests í Grensáskirkju. Sú vitneskja biskups varð hins vegar ekki tilefni til að hefja rannsókn á mögulegu broti séra Ólafs í starfi, hvort sem það væri siðferðisbrot eða kynferðisleg áreitni.

Úrskurðarnefnd þjóðkirkjunnar spurði Agnesi hvaða vitneskju hún byggi yfir um mál gegn séra Ólafi þegar nefndin vann að úrskurðunum fimm sem birtir voru í síðasta mánuði. Í svari biskups til nefndarinnar, sem dagsett er 12. febrúar, staðfestir biskup frásögn konunnar sem enn er prestur í Reykjavík, um að hún hefði rætt við biskup vegna máls sem kom upp milli þeirra árið 2010.

„Ég sendi sr. Ólaf í leyfi í sumar því ég líð ekki svona mál á minni vakt,“ sagði Agnes í frétt á forsíðu Fréttablaðsins þann 21. september þegar greint var frá því að þrjár konur hefðu stigið fram og kært hegðun Ólafs til úrskurðarnefndar kirkjunnar.

Í einum úrskurðinum sem féll í lok síðasta mánaðar eru afskipti biskups gagnrýnd í málinu. Aftur á móti segir biskup í fréttatilkynningu afstöðu sína skýra. „Biskup hlýtur ávallt að taka ásakanir um óviðeigandi háttsemi presta eða annarra starfsmanna kirkjunnar alvarlega. Það á sérstaklega við þegar grunur leikur á áreiti af kynferðislegum toga eða öðru ofbeldi,“ segir biskup.

„Það er í mínum huga óhugsandi, að æðsti embættismaður kirkjunnar stígi til hliðar og bregðist ekki við ef einstaklingur leitar til embættisins eftir hjálp við að leysa úr erfiðum og viðkvæmum málum.“

Agnes vildi ekki ræða það við Fréttablaðið af hverju ekkert hefði verið aðhafst í málinu árið 2014 og hvað væri breytt nú. Fréttablaðið fékk þau skilaboð frá Biskupsstofu að biskup myndi greina frá sinni aðild að málinu ef einhver málsaðili myndi áfrýja málalyktum úrskurðarnefndar til áfrýjunarnefndar.

Fimm konur kærðu séra Ólaf til úrskurðarnefndar þjóðkirkjunnar í fyrra fyrir athæfi sem þær töldu kynferðislega áreitni. Nefndin komst að þeirri niðurstöðu að Ólafur hefði gerst sekur um siðferðisbrot í tveimur málum.