Mögulegur stuðpúði ólíkra viðskiptaheima

Data Íslandia var fulltrúi Íslands á nýafstaðinni stórráðsstefnu um upplýsingatækni og gagnavistun í Þýskalandi. Framkvæmdastjóri fyrirtækisins, sem er í sameiginlegri eigu Símans og Skýrr og vinnur með Farice, vill nýjan sæstreng til Írlands, ekki Skotlands. Data Íslandia kynnti samkeppnishæfni íslenskrar upplýsingatækni á alþjóðlegum markaði á stærstu ráðstefnu um upplýsingatækni og gagnahýsingu á Storage Network World - Europe 2006, í Frankfurt í Þýskalandi sem lauk í gær. Forsvarsmenn fyrirtækisins segja að vel hafi gengið, náðst hafi samband við fjölda fyrirtækja og næstu vikur fari í að vinna úr gögnum. Ráðstefnuna í Frankfurt sóttu helstu ráðamenn lítilla og stórra fyrirtækja og samtaka, bæði í opinbera geiranum og einkageiranum, með það fyrir augum að afla sér upplýsinga um það nýjasta og besta í upplýsingatækni, hugbúnaði og þjónustu, svo og öðrum vörum tengdum vistun á rafrænum gögnum og stjórnun og rekstri þeirra. Data Íslandia var boðið að kynna íslenska upplýsingatækni og samkeppnishæfni í aðalframsögu á ráðstefnunni. Sol Squire, framkvæmdastjóri Data Íslandia, segir landið hafa verið kynnt sem ákjósanlegasta staðinn fyrir langtímavistun á rafrænum gögnum í allri Evrópu. Hér er tæknigeta mikil og hátt menntunarstig, efnahagurinn er stöðugur og umhverfið friðsælt. Hér getum við komið hlutum í verk mun hraðar en hægt er í öðrum löndum, auk þess sem landfræðileg staðsetning og þjóðfélagsgerð gerir okkur að nokkurs konar stuðpúða milli ólíkra viðskiptaheima. Við kynningu á landinu var einnig mikil áhersla lögð á Farice sæstrenginn og bendir Sol Squire á að þeir hnökrar sem þar hafi orðið á tengingum hafi allir verið í landi í Skotlandi. Rekstur strengsins hefur verið áreiðanlegur og í raun aldrei brugðist frá því að hann var tengdur, segir hann og kveðst stefna á viðskipti við stærstu fjölþjóðafyrirtæki í Evrópu og að hýsa fyrir þau gríðarlegt magn af rafrænum gögnum. Hann segir þó einnig horft til þess að á næstunni verði lagður nýr sæstrengur og það muni gulltryggja stöðu landsins sem vænlegrar miðstöðvar gagnahýsingar. Best væri að leggja nýjan streng beint til Írlands í tengipunkta sem ná svo yfir Atlantshafið. Eða tryggari tengingu beint til Manchester eða Liverpool. Í þessum efnum þarf að horfa til framtíðar, en möguleikarnir eru ótrúlegir. Það sagði mér framleiðandi eins mest notaða vistunarbúnaðar í heimi að hér hefðum við möguleika á að búa til gagnamiðstöð guðanna. Það hljómar vel enda fengi ég þar með hlutverk Þórs, segir hann og hlær. Data Íslandia hefur notið fulls stuðnings Fjárfestingarstofu Ís­lands enda fara saman áherslur í kynningarstarfi. Því er þetta kjörið tækifæri til að kynna íslenska upplýsingatækni og þekkingariðnað og Ísland sem raunhæfan fjárfestingakost fyrir erlenda aðila, segir Þórður H. Hilmarsson, framkvæmdastjóri Fjárfestingarstofunnar. Data Íslandia er samstarfsvettvangur Símans og Skýrr. Sol Squire segir þar engan skugga hafa borið á þrátt fyrir nýlegar breytingar í eignarhaldi Skýrr. Alls ekki, enda sýnir sig þar að hagnaðarvæntingar vega þyngra en einhverjar fyrirtækjaværingar. Svo er fyrirtækjalandslagið líka svo síkvikt að fólk setur slíkt ekki fyrir sig. Við vinnum bara áfram að okkar góðu málum. olikr@frettabladid.is