Skólastjórinn í 2 ára fangelsi

Jón Árni Rúnarsson, fyrrverandi skólastjóri Rafiðnaðarskólans, var dæmdur í tveggja ára fangelsi fyrir fjárdrátt og skjalafals á árunum 1994 til 2001 í Héraðsdómi Reykjavíkur í dag. Jón Árni var ákærður fyrir að hafa dregið sér tæpar 29 milljónir króna af svokölluðu eftirmenntunargjaldi sem ganga átti til reksturs skólans frá vinnuveitendum í rafiðnaði. Í forsendum dómsins segir að brotin hafi verið skipulögð og að Jón Árni hafi nýtt sér þá stöðu að menntakerfið hafi þanist hratt út á þessum árum. Brotin hafi verið framin með leynd og að ákærði hafi að engu leyti bætt það fjártjón sem brot hans leiddu af sér. Dómurinn er óskilorðsbundinn.