Seldi hlutabréf í Og Vodafone

Fyrirtæki í eigu Björgólfs Thors Björgólfssonar losuðu sig við hlutabréf sín í Og Vodafone skömmu áður en einkavæðingarnefnd kynnti fyrirkomulag á sölu Landssímans. Hlutabréfin hefðu gert Björgólf Thor vanhæfan til að bjóða í Símann. Einkavæðingarnefnd kynnti fyrirkomulag á sölu Landssímans á þriðjudag. Þar eru væntanlegum kjölfestufjárfestum sett ákveðin skilyrði fyrir að mega eignast hlut í Símanum. Á meðal þeirra er að kjölfestufjárfestir fari ekki með eignaraðild, hvorki beina né óbeina, í fyrirtækjum sem eiga í samkeppni við Símann hér á landi. Björgólfur Thor er einn þeirra fjárfesta sem hvað oftast er nefndur á nafn sem væntanlegur kaupandi Símans, enda kom fram í fréttum Stöðvar 2 í gær að sex aðilar, þrír erlendir og þrír innlendir, hafi sett sig í samband við Björgólf. Fyrirtæki tengd Björgólfi, Landsbankinn og Burðarás, hafa hins vegar um langt skeið átt stóran hlut í Og Vodafone sem hefði gert Björgólf vanhæfan í kapphlaupinu um Símann. Um miðjan mars, eða þremur vikum áður en einkavæðingarnefnd kynnti fyrirkomulag sölunnar, brá hins vegar svo við að Burðarás og Landsbankinn seldu hluti sína í Og Vodafone, og það sama daginn, eða þann 15. mars. Alls seldu þessi fyrirtæki 15 prósenta hlut í Og Vodafone og var söluverðið 2,6 milljarðar króna. Ásgeir Friðgeirsson, talsmaður Björgólfs Thors og fyrirtækja í hans eigu, svarar því afdráttarlaust neitandi aðspurður hvort Björgólfur og hans menn hafi vitað af því að þetta skilyrði yrði sett. Hins vegar segir hann það ekkert launungarmál að þá þegar hafi það verið í umræðunni að þetta yrði eitt skilyrðanna. Hann segir hins vegar að menn hafi talið að nú væri rétti tíminn til að selja og hvort sem það er tilviljun eða ekki, þá hagnaðist Björgólfur um á annan milljarð króna við söluna um leið og hann ruddi hindrun úr vegi sem hefði getað komið í veg fyrir að hann eignaðist væna sneið af Landssímanum.