„Eins og staðan er núna er Álfta­nes langt á undan okkur“

ÍR-ingar máttu þola 31 stigs tap á heimavelli í kvöld, eftir nokkuð jafnan fyrri hálfleik. Lokatölur 88-119.

„Ég ætla að reyna að einbeita mér að því jákvæða, en við þurfum líka að horfast í augu við það neikvæða. Því miður náðum við ekki að halda út og finna lausnir gegn aggressívri vörn Álftnesinga, en við munum vinna í því. Liðið mitt þarf að læra mikið af þessum leik, sérstaklega hvernig á að halda einbeitingu,“ sagði Borche í leikslok.

„Við náðum að minnka niður í tvö stig undir lok fyrri hálfleiks, en svo gleymum við okkur í hálfa mínútu og Álftanes refsar okkur með 8-0 kafla þannig að við förum inn í hálfleikinn í stöðunni 52-60. Þetta er eitthvað sem við þurfum að skoða og greina. Við vitum að í hvert skipti sem þú missir einbeitinguna þá er þér refsað. Eins og staðan er núna er Álftanes langt á undan okkur með sinn hóp og sinn leik og allt. Þeir eru með mikla orku og skoruðu flest sín stig vegna þess að þeir voru með mikla orku. Þeir eru með gott lið og við þurfum að leggja hart að okkur til að komast á þetta stig.“

„Það er enginn tími til að svekkja sig núna. Við þurfum að einbeita okkur að því jákvæða og fara inn í næstu umferð með jákvætt hugarfar.“

Þrátt fyrir að vilja einbeita sér að því jákvæða var ekki annað hægt en að minna Borche á það neikvæða úr leik hans manna. ÍR-ingar voru með undir 50 prósent vítanýtingu og 20 tapaða bolta sem gáfu Álftnesingum 29 auðveld stig.

„Ég hef meiri áhyggjur af vítanýtingunni en töpuðu boltunum því þetta er annar leikurinn í röð sem þetta gerist. Svo gerði Álftanes allt erfitt fyrir okkur. Hvort sem það var að við ætluðum að troða, eða ná í auðvelt stig undir körfunni þá komu þeir alltaf með góð brot. Þeir eru með breiðan hóp sem leyfir þeim að spila svona og við urðum óöruggir og byrjuðum að klikka,“ sagði Borche.

„Það var svona sem þeir brutu upp taktinn okkar, en við þurfum líka að horfast í augu við það sem við gerðum illa. Við megum ekki tapa svona mörgum boltum til að geta verið í betri stöðu í leiknum, sérstaklega í seinni hálfleik.“

Að lokum fór Borche stuttlega yfir næsta leik liðsins, þar sem ÍR-ingar heimsækja Hött austur á land.

„Höttur er með mjög gott lið og með mjög gott jafnvægi á sínu liði. ÞEir fengu líka svona skell á móti Álftanesi í fyrstu umferð, en það sem ég hef séð frá þeim þá eru þeir með mjög gott jafnvægi í sínu liði. Þeir eru með góða menn í öllum stöðum í bland við reynslubolta. Þetta verður erfiður leikur, en við fórum austur og mættum Sindra í fyrstu umferð og gerðum það vel. Ef við nálgumst næsta leik eins og við gerðum á móti Sindra þá hef ég fulla trú á því að við sækjum sigur,“ sagði Borche að lokum.