Full­trúi Ís­lands yfir­gaf ekki salinn þegar Netanja­hú steig í ræðu­stól

Þetta segir Ingileif Friðriksdóttir, aðstoðarmaður utanríkisráðherra. Hún hafi þess í stað verið á viðburði til stuðnings Palestínu-flóttamannahjálpar Sameinuðu þjóðanna (UNRWA) sem fram fór á sama tíma. 

Fulltrúi fastanefndar Íslands í mannréttindamálum hafi setið í sæti Íslands í sal allsherjarþingsins og verið þar áfram, ásamt fulltrúum annarra norrænna ríkja. Ráðherravika allsherjarþings Sameinuðu þjóðanna stendur nú yfir og eru bæði utanríkisráðherra og Kristrún Frostadóttir forsætisráðherra í New York vegna þessa.

Aðstoðarmaður ráðherra segir að Þorgerður hafi jafnframt tekið þátt í ráðherraviðburði um tveggja ríkja lausnina fyrr um daginn en henni er ætlað að koma á friði í samskiptum Ísraels og Palestínu.

Benjamín Netanjahú lét sér fátt um finnast þegar fulltrúar ríkja yfirgáfu salinn og kallaði þá siðferðislega hugleysingja.

Ásakanir um þjóðarmorð „stærsta lygi aldarinnar“

Netanjahú sagði ásakanir um þjóðarmorð Ísraelsmanna á Gasa vera „stærstu lygi aldarinnar“ í ögrandi ræðu sinni fyrir hálftómum sal allsherjarþingsins.

Komu hans var mætt með blöndu af fagnaðarlátum á meðan aðrir púuðu og gengu út, að sögn AP-fréttaveitunnar. Meirihluti sæta hafi staðið auð á meðan hann flutti ræðu sína.

„Ef það eru einhverjir aðrir siðferðislegir hugleysingjar sem hafa ekki enn yfirgefið salinn, vinsamlegast gerið það núna,“ sagði Netanjahú.

Hann hækkaði síðan róminn og sagði árásir Ísraels á Íran „hafa verið ein auðveldasta ákvörðun sem ég hef nokkurn tíma þurft að taka“ og fordæmdi þá fulltrúa sem gengu út úr salnum.

Mahmoud Abbas, forseti Palestínu, neyddist til að ávarpa Sameinuðu þjóðirnar með myndskeiði eftir að Bandaríkin synjuðu honum aftur um vegabréfsáritun og komu þannig í veg fyrir að hann gæti sótt allsherjarþingið.

Fréttin hefur verið uppfærð.