Enn eitt á­fallið fyrir Manchester United

Shae Lacy var í byrjunarliði Manchester United þegar liðið tók á móti Brighton í deildarbikarnum í kvöld. Hann deildi mynd af sér fyrir framan Manchester United merkið eftir að fréttir bárust að ungstirnið JJ Gabriel vildi fara frá félaginu.

 Shae Lacey þakkaði traustið strax á áttundu mínútu þegar hann skaut frábæru skoti í nærhornið sem var óverjandi fyrir Jason Steele í marki Brighton. Aðeins tveim mínútum síðar tvöfaldaði Manchester United forystuna þegar Marcus Rashford keyrði upp kantinn og skaut á mark Brighton. Steele varði boltann en hann datt fyrir Mason Mount í teignum sem gat sett boltann þægilega í netið.

Manchester United virtist ætla að halda tveggja marka forystu í hálfleik en Brighton minnkaði muninn í uppbótartíma með marki frá Charalampos Kostulas. Pascal Gross jafnaði svo metin fyrir Brighton á 65. mínútu og virtist lið Manchester United vera búið að missa tökin á leiknum.

Brighton náði forystu leiksins fimm mínútum síðar þegar varamaðurinn Maxim De Cuyper skoraði eftir frábæra sókn og taflinu allt í einu snúið við. Manchester United gerði ýmsar skiptingar til þess að reyna að ná jöfnunarmarki fyrir leikslok en það tókst ekki og náði því Brighton að tryggja sig í 16-liða úrslit bikarsins.

Staðan í deildarbikarnum ekki betri en í ensku úrvalsdeildinni

Annar úrvalsdeildarslagur var þegar Coventry tók á móti Aston Villa. Gengi Coventry hefur ekki verið gott í ensku úrvalsdeildinni og virtist það ekki vera að breytast. Tammy Abraham kom Aston Villa í forystu strax á sjöundu mínútu.

Á 27. mínútu náði Coventry að jafna metin en eftir jöfnunarmarkið tók Aston Villa yfir leikinn. Ross Barkley kom Aston Villa í forystu og Tammy Abraham skoraði sitt annað mark til að koma Aston Villa í 3-1 sem reyndust vera lokatölur leiksins.

Everton sigldi þægilegum sigri heim

Í leik Everton og Wolves var fyrsta markið lengi að koma en Everton var sterkari aðilinn framan af. Erfiðlega gekk þó fyrir liðið að nýta færin sín en það hafðist loksins á 80. mínútu þegar Charly Alcaraz kláraði færi eftir góðan undirbúning frá Tyler Dibling.

Þetta reyndist eina mark leiksins og náði Everton því að slá út Wolves sem spilar í ensku B-deildinni eftir að hafa fallið úr ensku úrvalsdeildinni á síðasta tímabili.

Óvæntur sigur í Norður-Englandi

Fleetwood Town, sem leikur í ensku D-deildinni, tók á móti Sheffield United en þar urðu óvænt úrslit. Eina mark leiksins kom á 57. mínútu þegar fyrirgjöf kom í teig Sheffield. Þaðan fór boltinn í hausinn á Rhys Norrington-Davies sem skoraði sjálfsmark.

Fleetwood Town slóg því út lið sem spilar í tveimur deildum fyrir ofan og heldur áfram í næstu umferð deildarbikarsins.