Er­lendir fjöl­miðlar fylgjast með: Trump hafi þvingað Ís­lendinga í kjör­klefana

Ef helstu fréttamiðlar nærri Íslandi eru skrunaðir má sjá Íslandi bregða fyrir og myndir af íslenskum fánum. 

Breska ríkisútvarpið tók saman helstu punkta fyrir lesendur sína og vísar í skoðanakönnun sem segir að 51,6 prósent hyggist segja nei en tekur fram að fyrri skoðanakannanir hafi talið já-sinna fleiri. Reifað er hvað sé í raun verið að greiða atkvæði um, helstu málefni og rök beggja hliða.

Umfjöllun danska ríkisútvarpsins féll í hendur Helga Ólafssonar sem birti myndband á vefsíðu DR í morgun. 

Í TV2 í Danmörku er uppslátturinn annar en fyrirsögnin á þeirra frétt er að Donald Trump Bandaríkjaforseti hafi þvingað Íslendinga í kjörklefana. Þau taka fram í fréttinni sinni að miðað við skoðanakannanir gæti litlu munað.

Langflestar fréttir á norsku miðlunum eru um andlát Haralds Noregskonungs en hann lést snemma í gærmorgun. Norska ríkisútvarpið birti samt sem áður stutta færslu um atkvæðagreiðsluna og birti norska TV2 einnig frétt um að atkvæðagreiðslan væri hafin. Sömuleiðis var birt stutt frétt á vefsíðu finnska ríkisútvarpsins.

Írska ríkisútvarpið minnist einnig á Trump í frétt sinni um atkvæðagreiðsluna en tekur fram að helsti ágreiningurinn fyrir atkvæðagreiðsluna hafi varðað innlend málefni. Þau ræddu við Katrínu Jakobsdóttur, fyrrverandi forsætisráðherra, eftir að hún tók til máls á fundi Áfram Ísland í gær.

Sænska ríkisútvarpið tekur einnig þátt í umfjölluninni og birti í gærkvöldi frétt um þjóðaratkvæðagreiðsluna. Þar ræddu þau við fulltrúa sjávarútvegsins og útskýrðu fyrir lesendum að málefni sjávarútvegsins hafi verið afar heitt málefni í aðdraganda kosninganna. 

Í þessum rituðu orðum prýðir Austurvöllur forsíðu AP-fréttaveitunnar og segja þau að Íslendingar gangi í kjörklefana eftir að Trump hafi ítrekað haft í hótunum um að taka yfir nágrannalandið Grænland.