Barilla og Himneskt víkja fyrir breiðara pastaúrvali

„Við erum að styrkja okkur í pastaflokknum, bæði í verðum og fjölbreytileika,“ segir Björgvin Víkingsson, framkvæmdastjóri Bónuss.

Nýja úrvalinu verður skipt með skýrari hætti eftir verði og gæðum. Þar verður hægt að velja á milli ódýrra tegunda, pasta í miðlungsverðflokki og vandaðra vara í hæsta gæðaflokki.

Salling verður áberandi í ódýrari hluta hillunnar. Hagar hófu innkaupasamstarf við danska smásölurisann Salling Group fyrr á árinu og boðuðu þá lægra verð á hundruðum vara í Bónus og Hagkaupum.

Hagar sögðu í síðustu viku að vörur frá Salling hefðu að meðaltali komið í verslanir á rúmlega 15 prósentum lægra verði en sambærilegar vörur sem fyrir voru. Í mörgum tilvikum væri verðmunurinn enn meiri.

Í dýrari enda pastahillunnar verður ítalska vörumerkið Garofalo. Bónus vill kynna það betur fyrir íslenskum neytendum sem úrvalsmerki en segir jafnframt hafa tekist að tryggja hagstætt verð á vörunum.

„Því miður þurfa tvö vörumerki að fara og þess vegna hverfa Barilla og Himneskt í bili,“ segir Björgvin.

Hann segir markmiðið þó að breikka pastaflokkinn og bjóða neytendum meira úrval en áður, hvort sem þeir leita að ódýru hversdagspasta, lífrænum vörum, próteinríkari valkosti eða ítölsku úrvalspasta.