Gögnin sýna að Evrópa er lang­mikilvægasta markaðs­svæði Ís­lands

Skýrslu sem gefin var út í nafni RSE, undir heitinu “Utanríkisverslun Íslands: Raunveruleg mynd” hefur verið haldið á lofti meðal Nei sinna til að teikna upp þá mynd að vægi ESB sé ofmetið og sé sambærilegt við vægi Bandaríkjanna. Innflutningur fær litla umfjöllun. Þó svo að grunngögn RSE-skýrslunnar standist að mestu skoðun, styðja gögnin ekki þá mynd sem þar er teiknuð.

Þvert á móti sýna gögnin:

ESB eitt tekur við um helmingi alls útflutnings Íslands. Bandaríkin taka við um 22%. Helmingur alls innflutnings kemur frá ESB. Um 10% innflutnings kemur frá Bandaríkjunum, sem er næst stærst.

ESB er stærsti markaðurinn bæði fyrir íslenskar vörur og þjónustu.

Um 63% alls útflutnings fer til Evrópu - ESB, Bretlands og Noregs, og um 65% innflutnings koma þaðan.

Þessir Evrópumarkaðir og Bandaríkin taka saman við um 85% útflutnings Íslands, og eru uppspretta 75% innflutnings.

Þrátt fyrir að 12 ár séu liðin frá gildistöku fríverslunarsamnings við Kína, er útflutningur til Kína um 1,6% af heildinni. Indland vegur minna en Færeyjar.

Gögnin sýna því með óyggjandi hætti að Evrópa er langmikilvægasta markaðssvæði Íslands.

Í næstkomandi þjóðaratkvæðagreiðslu er ekki verið að greiða atkvæði um aðild Íslands að Evrópusambandinu. Spurningin er hvort við viljum taka samtal og skipulega vinnu um helstu hagmunamál þjóðarinnar við stærsta og mikilvægasta viðskiptasvæði okkar, sem í gegnum aukaaðild okkar að Evrópusambandinu setur megnið af reglum okkar atvinnulífs.

Ég segi já til að sjá.

Höfundur er framkvæmdastjóri og áhugamaður um nýsköpun, viðskiptafrelsi og framtíð Íslands.