Eldarnir þeir skæðustu sem hafi nokkurn tímann herjað á landið

Freyja Þórisdóttir skrifar 25. júlí 2026 09:40

Yfir þúsund slökkviliðsmenn hafa verið kallaðir út til að ná stjórn á gróðureldunum sem hafa breiðst hratt út í Suður-Frakklandi. Myndin er tekin í bænum Cotignac sem er í grennd við eina stærstu borg Frakklands, Marseille. Getty

Alls hefur ríflega tvö hundruð og fimmtíu þúsund manns verið gert að rýma svæði í Suður-Evrópu og nú loga gróðureldar víða í Frakklandi og á Spáni. Langar bílaraðir mynduðust þegar þúsundir flúðu á brott úr úthverfum borgarinnar Bordeaux í suðvesturhluta Frakklands í nótt.

Forsætisráðherra Frakklands hefur sagt gróðureldana þá skæðustu sem nokkurn tímann hafa herjað á landið og að ríflega hundrað og fjörutíu þúsund manns hafi þegar verið flutt á brott frá Gironde- og Landes-héruðunum nálægt Bordeaux þar sem gróðureldarnir brutust út í vikunni. Ökumönnum væri sömuleiðis ráðlagt að forðast svæðið.

Meðalhitinn ríflega þrjátíu gráður

Kemur þetta fram í umfjöllun fréttaveitunnar Reuters um málið en þar er haft eftir Sophie Brocas, sem stýrir sveitarstjórn La Nouvelle-Aquitaine et de la Gironde, sem nær yfir Bordeaux-svæðið, að svæðin Le Haillan, Eysines og Merignac væru rýmd.

Bordeaux-svæðið er frægt fyrir vínekrur sínar og borgin er ein helsta samgöngumiðstöð ferðamanna sem heimsækja nálæga sumarleyfisstaði við Atlantshafsströndina. Herinn hefur samkvæmt umfjöllun Reuters verið kallaður til aðstoðar slökkviliði og viðbragðsaðilum á svæðinu.

Þekkir þú Íslendinga á svæðum þar sem skógareldar geysa? Sendu okkur ábendingu á ritstjorn@visir.is.

Norðan við Bordeaux sást og fannst reykur frá gróðureldunum í Haute-Vienne-héraði, þar sem yfirvöld ráðlögðu fólki að halda hurðum og gluggum lokuðum.

Hingað til í júlímánuði hefur meðalhitinn verið 32,2 gráður á svæðinu, sem er 7,3 gráðum yfir mældum hámarkshita í júlí á árunum 1961 til 1990, samkvæmt gögnum frá Reuters Climate Monitor.

Veður Hitabylgja í Evrópu sumarið 2026 Frakkland Gróðureldar

Mest lesið

Fleiri fréttir