Tove nýtti tímann sinn á Ís­landi til hins ítrasta

Tove vann Laugavegshlaupið í ár á nýju brautarmeti en hún naut þess einnig að vera úti í íslensku náttúrunni og hitaði upp fyrir Laugaveginn með því að keppa í Dyrfjallahlaupinu.

Auk þess að vinna sinn flokk varð Tove í þriðja sæti í heildarkeppninni í Laugavegshlaupinu og setti brautarmet í kvennaflokki á tímanum fjórum klukkutímum, fjórtán mínútum og átta sekúndum.

Tove er ein allra fremsta hlaupakona heims og situr á toppi heimslista ITRA (International Trail Running Association). Hún er ríkjandi heimsmeistari í utanvegahlaupum og hefur þess utan unnið tæplega þrjátíu heimsmeistaratitla í rathlaupi og skíðarathlaupi.

Tove hefur nú gert upp Íslandsferð sína með flottum myndasyrpum frá ferðinni hennar.

Hún birti meðal annars magnaða mynd af sér á Kristínartindum sem eru innan svæðis Skaftafells í suðurhluta Vatnajökulsþjóðgarðs. Gönguleiðir á Kristínartinda eru frá tjaldstæðinu í Skaftafelli.

„Ísland. Fyrsti dagurinn í Reykjavík, skoðunarferð um borgina, dýrindis matur og hlaup á gígum, fjöllum og hraunum,“ skrifaði Tove og hélt áfram:

„Dagur 2: Bílferð til Akureyrar og skoðunarferð að fossum. Dagur 3: Hálfur dagur á Akureyri með hlaupi í fjöllunum og endurheimtarbaði til að vera tilbúin fyrir helgina,“ skrifaði Tove.

„Bílferðin heldur áfram með nokkrum stoppum á flottum stöðum, Grjótagjá. Stopp á flottu jarðhitasvæði og fara til Bakkagerðis fyrir Dýrfjallahlaupið,“ bætti Tove við.

„Við nýttum svo sannarlega tímann okkar á Íslandi til hins ítrasta. Þetta var frábær upplifun með allri þessari flottu náttúru og vinalega fólkinu sem við hittum,“ skrifaði Tove.

„Síðustu þrír dagarnir, föstudagurinn á Gullna hringnum, með Strokk, Gullfoss, Laugarvatn og Þingvelli. Laugavegshlaupið síðasta laugardag, 55 km frá Landmannalaugum til Húsadals í gegnum stórbrotið landslag. Síðasti dagurinn í eins kílómetra langa hellinum Leiðarenda og Brimkatli áður en flogið var heim,“ skrifaði Tove.