„Ha? Hvernig getur það verið?“

Gríðarleg hitabylgja hefur gengið yfir Evrópu og halda flestir sig innandyra að kæla sig niður á meðan Elísa hljóp 80 kílómetra í Lavar­edo-utan­vega­hlaupinu í ítölsku Ölpunum.

„Það voru margir að senda á mig fyrir hlaupið: „Verður hlaupið út af hitanum?“ „Er sniðugt fyrir þig að hlaupa í þessum hita?“ en það var aldrei að stressa mig, þessi hiti. Ég er ekki að búa til óþarfa stress áður en maður fer inn í aðstæðurnar. Maður bara hleypur af stað og sér hvað gerist,“

Sérstök hitaþjálfun vikurnar fyrir hlaupið kom sér sérstaklega vel.

„Það var að skila mjög góðum árangri í hlaupinu og hitinn hafði blessunarlega ekki áhrif á mig. Ég var líka dugleg að kæla mig í öllum lækjum sem ég sá, ég skóflaði derhúfunni ofan í lækinn og skvetti yfir mig. Það er mjög mikilvægt að kæla sig í svona heitum aðstæðum, drekka mikinn vökva og ég pældi mikið í saltinntöku. Það einhvern veginn small allt,“ segir Elísa.

Hún hljóp vegalengdina átta klukku­stundum og 59,57 sekúndum og náði þar með stóra mark­miði sínu í hlaupinu að klára á undir níu klukku­stundum. Hún var heilum þrettán mínútum á undan Marie Goncalves í endamarkið en sú endaði í öðru sæti.

Hlaupið hefði vart getað gengið betur en það fór fram í fjall­lendi í grennd við Dólómítana. Átta­tíu kíló­metra vega­lengd með um 4.500 metra hækkun. Þá var hitinn mikill sökum hita­bylgju sem gengur yfir megin­land Evrópu þessi dægrin.

„Almennt er það alveg þannig í svona löngum hlaupum að það kemur tímapunktur þar sem ég er orðin mjög þreytt, þetta er erfitt og mér er illt einhversstaðar eða eitthvað svoleiðis. En ekki í þessu hlaupi,“

„Ég var bara að njóta mín allan tímann, þetta er náttúrulega magnað umhverfi sem ég var að hlaupa í. Þetta var eins og að vera í póstkorti, án gríns. Mér leið ótrúlega vel, mér fannst þetta svo skemmtilegt. Það var aldrei tímapunktur sem var eitthvað erfiðari en annar, sem er eiginlega frekar ótrúlegt,“

„Ég man eftir því að ég kíkti á úrið og það voru komnir 50 kílómetrar. Ég var bara „ha? Hvernig getur það verið? Það var svo lítið eftir, ætli ég geti hlaupið aftur til baka?“ Mér fannst þetta ótrúlega gaman,“ segir Elísa og hlær.

Innslag úr Sportpakka gærkvöldsins má sjá efst. Að neðan má sjá lengri útgáfu af viðtalinu við Elísu.