Flug­virkjar skora á Icelandair að hverfa frá á­formum sínum

„Það má vel rökstyðja mikilvægi þess að hafa góða aðgreiningu á milli flota Icelandair og véla í verkefnum fyrir aðra flugrekendur. En það eru hæg heimatökin að koma þeirri aðgreiningu á hér heima hafi menn vilja til þess,“ segir í yfirlýsingu á vef félagsins sem birt var í gær.

Þar kemur einnig fram að FVFÍ leggi áherslu á að félagið líti þetta mál alvarlegum augum.

„Hér er ekki aðeins um að ræða innri skipulagsbreytingu heldur stefnumarkandi ákvörðun um hvar tæknileg þekking, ábyrgð og störf innan Icelandair-samstæðunnar eigi að vera til framtíðar,“ segir í yfirlýsingunni.

Í yfirlýsingu FVFÍ kemur einnig fram að félagið hafi sent bréf til framkvæmdastjóra og stjórnarformanna þeirra níu lífeyrissjóða sem eiga hlut í Icelandair Group og að það kalli eftir því að sjóðirnir kynni sér áætlanir Icelandair um flutning sérhæfðra tæknistarfa, þekkingar og framtíðarverkefna úr landi.

Flugmenn Icelandair í Félagi íslenskra atvinnuflugmanna (FÍA) eiga í kjaraviðræðum við félagið. Fjölmiðlabann hefur verið sett á deiluna og því hefur lítið heyrst af gangi viðræðna en það virtist komin hreyfing í kjaraviðræðurnar Icelandair og að sögn ríkissáttasemjara. Icelandair kynnti í gærkvöldi heildstæðari nálgun á kjaramál flugmanna sem fulltrúar þeirra hafa nú til skoðunar. Fundi samningsaðila lauk um klukkan 21:35 í Karphúsinu og hafði staðið yfir frá 19:00.