Risafréttir af Putellas fyrir Reykjavíkurför

Þessi miklu tíðindi koma nú þegar aðeins tvær vikur eru þar til að Putellas og liðsfélagar hennar í heimsmeistaraliði Spánar spila við Ísland á Laugardalsvelli, í lokaumferð undankeppni HM.

Putellas, sem er 32 ára, hefur spilað með Barcelona síðustu 14 ár og verið lykilmaður í besta liði Evrópu en hún hefur fagnað sigri í Meistaradeildinni alls fjórum sinnum með liðinu.

Putellas hefur auk þess orðið Spánarmeistari tíu sinnum og alls unnið 38 titla með Barcelona. Hún á markamet félagsins og hefur skorað 232 mörk í 507 leikjum. Aðeins Melanie Serrano á fleiri leiki að baki fyrir félagið og það munar bara níu leikjum á þeim.

BBC segir að enska félagið London City Lionesses sé líklegt til að landa Putellas og að viðræður hafi staðið yfir síðustu mánuði.

„Ég sagði að lokastundin myndi koma á meðan að ég væri upp á mitt besta, gæti gefið allt og hefði hundrað prósent orku,“ sagði Putellas í kveðju sinni á Instagram.

„Núna er sú stund runnin upp. Þetta hefur verið fullkomin saga,“ sagði Putellas og hélt áfram.

„[Þegar ég var sex ára] sá ég bara karlmenn spila á leikvanginum og það hefði aldrei hvarflað að mér að einn daginn, á þessum sama stað, myndu 90.000 stuðningsmenn Barcelona kalla nafnið mitt. Við höfum farið lengra með kvennaliðið en við hefðum getað ímyndað okkur.“