Elísa rétt missti af silfri: „Svo kemur þetta hel­vítis sikk sakk“

Elísa hafnaði í 4. sæti í keppni kvenna í 43,9 kílómetra hlaupinu sem fram fer í mikilli hæð. Keppendur voru ræstir af stað í 1.450 metra hæð og hlupu svo í um og yfir 2.000 metra hæð í 15 kílómetra en heildarhækkun í hlaupinu er heilir 1.800 metrar.

Elísa kom í mark á 4:18:44 klukkutímum en hin spænska Ikram Rharsalla, sem varð í 8. sæti í 45 km hlaupi á HM í utanvegahlaupum í fyrra, fagnaði sigri á 4:12:53 tímum.

Elísa var aðeins um mínútu frá silfrinu og ekki nema 48 sekúndum frá bronsi, langt á undan næstu keppendum.

„Þetta var ógeðslega erfitt,“ sagði Elísa á Instagram-síðu sinni. „Mér leið eins og við værum endalaust að hækka og hækka. Að þetta væri bara aldrei búið. Það kom aldrei svona „rúllandi“ spölur þar sem maður gat aðeins andað. Þetta var bara upp og svo ellefu kílómetra niður sem ég var mjög spennt fyrir en ég var dauð eftir 5-6 kílómetra í niðurhlaupinu,“ sagði Elísa.

Hún var í 2. sæti þegar sex kílómetrar voru eftir og í 3. sæti þar til að aðeins tveir kílómetrar voru eftir. Tíðar beygjur í lokin gerðu Elísu hins vegar erfitt fyrir.

„Svo kemur þetta helvítis sikk sakk og þá fer allt í skrúfuna. En allt í góðu, þetta var geggjað,“ sagði Elísa stolt.

Þess má geta að gamla brautarmetið, sem sett var í fyrra, var 4:29:19 og Elísa var því langt undir þeim tíma líkt og fyrstu þrír keppendurnir.