Reiddist og felldi son Robinho

Um var að ræða æfingu hjá leikmönnum sem spiluðu ekki gegn Palmeiras á laugardaginn og reiddist Neymar þegar Robinho Jr., nafni og sonur fyrrverandi leikmanns Real Madrid og Manchester City, lék á hann.

ESPN í Brasilíu segir að Neymar hafi þá fellt táninginn og í kjölfarið hófst heiftúðugt rifrildi á milli þeirra áður en liðsfélagar náðu að stía þeim í sundur.

Neymar mun svo hafa séð að sér og hringt í Robinho Jr. auk þess að senda skilaboð til fjölskyldu hans, til að biðjast afsökunar á framferði sínu á æfingasvæðinu. Hann viðurkenndi mistök sín en hinn ungi liðsfélagi hans er sagður hrelldur yfir því sem á gekk.

Samkvæmt heimildum ESPN er samband þeirra þó náið dags daglega og ekki búist við öðru en að tíminn græði sárin fljótt og vel.