„Alltaf að líða þannig í vinnunni þinni að þú skiptir máli“

Enda hluti starfsins að finna vel hæft starfsfólk erlendis frá og reyna að „selja“ því hugmyndina um að flytja til Íslands, oft með maka og börn.

Kathryn segir Ísland samt hafa upp á mjög margt að bjóða fyrir fólk sem kemur úr stærri samfélögum.

„Það er til dæmis gott að ala upp börn á Íslandi og hér stutt í allar áttir, varla að það taki þig lengri tíma en 20 mínútur að komast til vinnu. Erlendis er fólk vant því að vera kannski allt að einn og hálfan tíma í vinnuna. Hvora leið!“

Fyrst og fremst er Alvotech þó spennandi vinnustaður fyrir fólk búsett hér nú þegar að starfa hjá. Enda starfrækir félagið meðal annars Alvotech skóla til þess að þjálfa upp fólk í sérfræðistörf.

Starfsfólk á Íslandi er um eitt þúsund. Í heiminum öllum um 1500 manns samtals, frá 70 þjóðerni. Starf Kathryn kemur að mannauðsmálunum má segja frá a-ö:

„Allt frá því þegar ákvörðun um ráðningu er tekin og tryggja þarf að nýr starfsmaður upplifi vinnustaðinn á jákvæðan hátt, yfir í hvernig fólki líður þegar það er að vinna hér, yfir í hvernig við kveðjum fólk enda aldrei að vita hvort fólk sem hættir snúi aftur til starfa og svo framvegis,“ segir Kathryn. Sem sjálf hefur reynslu af því að starfa sem stjórnandi fyrir alþjóðleg fyrirtæki í Bretlandi, auk þess að hafa sett á laggirnar rekstur á Íslandi eftir að hún flutti til Íslands árið 2016.

Í Atvinnulífinu í gær og í dag er fjallað um samsetningu ólíkra hópa með tilliti til uppbyggingar á vinnustaðamenningu.

Fólk er menning

Að starfa á ólíkum tímabeltum er áskorun út af fyrir sig, en Alvotech starfar í Evrópu, Asíu og Bandaríkjunum.

„Bara það eitt að tryggja góða upplýsingamiðlun felur það í sér að hér þarf að hugsa um tímasetninguna með tilliti til mismunandi tímabelta. Því við leggjum mikla áherslu á að allir upplifi sig sem hluta af teyminu; að tilheyra skiptir miklu máli,“ nefnir Kathryn sem dæmi um hvernig góð upplýsingamiðlun snýst ekki aðeins um það að koma réttum upplýsingum til skila á sem bestan hátt. Heldur líka hvenær og hvernig.

„Starfsstöðvar og útibú geta líka verið mjög ólík. Sumt starfsfólk vinnur á útibúum sem við rekum í löndum eins og Sviss, Þýskalandi, í Svíþjóð eða Indlandi á meðan aðrir starfa í fjarvinnu heiman frá sér. Þetta eru svokallaðar dreifingarmiðstöðvar enda hluti af okkar starfsfólki sérfræðingar sem starfa við sína sérfræði í heilbrigðisgeiranum en tilheyra einnig okkar teymi.“

En hvernig er hægt að byggja upp vinnustaðamenningu með svona marga innanborðs, ólíka einstaklinga, störf, útibú og svo framvegis?

„Það sem skiptir mestu máli í því er að horfa á vinnustaðamenninguna út frá fólkinu sjálfu. Því í raun er menning ekkert nema fólkið sjálft. Við erum öll hluti af menningu og við sem starfsfólk sköpum menninguna. Samskiptin okkar í milli eru til dæmis hluti af menningu,“ svarar Kathryn sem dæmi.

Hver er hvatinn?

Kathryn segir mikilvægt að horfa á fólk sem menningu og viðurkenna þá um leið að menning getur verið ólík.

„Því það er hægt að standa fyrir endalausum vinnustofum eða búa til handbækur og ramma um hvernig menning eigi að vera eða byggja upp. En ef fólk er ekki að upplifa sjálft sig sem menninguna skilar þessi vinna litlu.“

Ef starfsfólk fær þau skilaboð að það sé í raun undirstaða menningarinnar er tilfinning fyrir því að tilheyra strax komin.

„Að fólk upplifi sig tilheyra hópi er lykilatriði sem þarf til að byggja upp liðsheild.“

Fyrst er þó að rýna í það hvað drífur fólk áfram.

„Hver er hin raunverulega hvatning fólks er spurningin sem við þurfum alltaf að velta fyrir okkur. Þessi hvati getur verið mjög mismunandi. Stjórnendateymið er kannski að horfa á tekjurnar og framgang félagsins í heild með hag hluthafa að leiðarljósi á meðan einhver sem er í mjög sérhæfðu starfi upplifir sinn hvata vera að auka á öryggi sjúklinga.“

Kathryn segir vinnustaðamenningu byggjast upp smátt og smátt eins og hús. Þar sem hver eining skiptir máli.

Grunnurinn þarf að vera sterkur því á honum stendur húsið. 

Það sem þetta þýðir er að stjórnendur eru í lykilhlutverki því eftir höfðinu dansa limirnir. 

Á endanum eru það samt allir starfsmenn sem skipta máli, því án fólksins verður sterkur grunnur ekki byggður.“

Góðu ráðin í þessum efnum sé að tryggja að hópurinn í heild sinni hafi séu leiðarljósi það sem fyrirtækið stendur fyrir, viti hver markmið þess eru og gildi.

„Í okkar tilfelli er sá hvati sameiginlegur að fólk fái ódýrari lyf og að fólki sé tryggt aðgengi að lyfjum. Þetta markmið sameinar okkur, óháð því hversu mörg við erum eða frá hversu ólíkum stöðum við erum,“ segir Kathryn en bætir við:

„Síðan að hver og ein eining eða einstaklingur fái frelsi til að vera hluti af því að skapa frábæra vinnustaðamenningu. Vinnustaðamenning er nefnilega ekki eitthvað fyrirbæri þar sem eitthvað eitt hentar öllum. Vegvísirinn þarf vissulega að vera til staðar en á endanum snýst þetta bara um mannauðinn sjálfan og þá hvata sem drífur fólkið áfram innan fyrirtækisins.“

Lykilatriðin fjögur

En er engin hætta á að fyrirtæki missi svolítið þetta mannlega eða persónulega, þegar þau eru orðin svona stór?

„Nei, en vissulega felast í því ákveðnar áskoranir og í þessum efnum er hlutverk stjórnandans gífurlega mikilvægt,“ svarar Kathryn en nefnir fjögur atriði sem hún segir vera lykilatriði til þess að vel takist til.

Fyrsta atriðið sé að fólki finnist það tilheyra; að það upplifi sig skipta máli innan liðsheildarinnar.

Fólk vill líka að á það sé hlustað og eftir því sé tekið.

„Það þurfa allir að upplifa viðurkenningu fyrir starfið sitt, óháð því hvert starfið er,“ segir Kathryn.

Þriðja atriðið er að tryggja að stuðningur og aðstæður séu til staðar þannig að fólk geti sinnt því starfi og því hlutverki sem því er ætlað að sinna.

„Loks er það félagslegi hlutinn og hvernig fólk er að upplifa það að vinna á þessum vinnustað. Er það stolt af fyrirtækinu og því sem það stendur fyrir?“ nefnir Kathryn loks sem fjórða og síðasta lykilatriðið.

Öll þessi fjögur atriði þurfa að skoðast og vera tryggð. Annars fer allt annað að brotna upp. Hvort sem það er liðsheildin, starfsánægjan, afköst eða drifkrafturinn fyrir því sem við erum að gera í vinnunni okkar.“

Það mannlega sé því í raun alltaf í forgrunni þegar kemur að því að byggja upp vinnustaðamenningu. Óháð því hvort hópurinn samanstandi af mörgum,óóháðm einstaklingum eða ekki.

„Þér þarf alltaf að líða þannig í vinnunni þinni að þú skiptir máli.“