Skoðar að enda stríðið án þess að opna Hormússund

Sundið yrði svo mögulega hægt að opna með viðræðum við klerkastjórnina í Íran. Gangi það ekki eftir myndu Bandaríkjamenn þrýsta á bandamenn sína í Evrópu og Mið-Austurlöndum um að sjá um að opna sundið aftur.

Þetta hafa blaðamenn Wall Street Journal eftir heimildarmönnum sínum úr Hvíta húsinu. Miðillinn segir nokkrar hernaðaraðgerðir til skoðunar en forsetinn leggi ekki áherslu á þær.

Ísraelar eru einnig að gera árásir á Íran en talsmaður ísraelska hersins sagði í morgun að þeir væru tilbúnir til að halda þeim áfram um margra vikna skeið.

Vilja fullveldi yfir Hormússundi

Lokun Hormússunds hefur haft mikil áhrif á hagkerfi heimsins og því lengur sem hún stendur yfir, því lengur munu áhrifin vara.

Einn sérfræðingur í málefnum Írans sem blaðamenn WSJ ræddu við sagði það gífurlega óábyrgt af Trump, ef hann myndi þvo hendur sínar af vandamálinu með Hormússund. Það væri vandamál sem hann og Ísraelar hefðu skapað og það væri ómögulegt fyrir Bandaríkjamenn að einangra sig frá efnahagslegum afleiðingum þess.

Um fimmtungur allrar olíu heimsins fer um Hormússund en þar er einnig flutt mikið magn af jarðgasi, áburði og ýmsum öðrum mikilvægum vörum fyrir hagkerfi heimsins. Eftir að Bandaríkjamenn og Ísraelar hófu árásir á Íran fyrir rúmum mánuði hófu Íranir að gera árásir á flutningaskip sem siglt var um Hormússund og koma fyrir tundurduflum.

Síðan þá hefur dregið verulega úr siglingum þar um.

Áhafnir hundruð skipa bíða sitt hvoru megin við sundið eftir því að komast í gegn. Einhverjir hafa greitt Írönum fyrir leyfi um að sigla í gegnum sundið og ætla ráðamenn þar sér að setja toll á siglingar skipa þar um.

Árás var gerð á eitt flutningaskip undan ströndum Dubaí í nótt. Þá var þremur kínverskum flutningaskipum siglt um sundið.

Sundið er í raun alþjóðlegt hafsvæði en siglingaleiðirnar gegnum Hormússund eru eingöngu tveggja sjómílna breiðar og þarf að beygja skipum á milli tveggja eyja sem Íranir stjórna annars vegar og fjalllendis hins vegar, þar sem hersveitir Írana geta fundið mikið skjól gegn loftárásum.

Hefðbundnum herskipum Írana hefur flestum verið sökkt af Bandaríkjamönnum en Íranir hafa margar leiðir til að loka sundinu.

Með notkun sjálfsprengidróna, eldflauga, tundurdufla, smárra fjarstýrðra kafbáta, sæþotna og hefðbundins stórskotaliðs, svo eitthvað sé nefnt, geta Íranar gert áhöfnum olíuflutningaskipa mjög hættulegt að sigla þarna um.

Skipin eru risastór og fara hægt um sundið, sem gerir þau að tiltölulega auðveldum skotmörkum.

Ein af þeim kröfum sem klerkastjórnin hefur lagt fram í lauslegum viðræðum við Bandaríkjamenn í gegnum Pakistana er að Íranir öðlist fullveldi yfir Hormússundi. En þannig gætu Íranir fest tolla fyrir siglingar þar í gegn í sessi.

Óhætt er að segja að það yrðu ráðamenn í ríkjum við Persaflóa, eins og Sádi-Arabíu og Katar, ekki sáttir við.

Heimtaði opnun sundsins í gær

Frá því árásirnar á Íran hófust hefur Trump verið margsaga um markmið stríðsins og hefur hann farið um víðan völl þegar kemur að því hve lengi hann sjái fyrir sér að stríðið vari eða hvort það sé yfir höfuð búið eða ekki. Hann hefur margsinnis sagt að klerkastjórnin hafi verið gersigruð.

Í gær hótaði hann að sprengja upp hvert einasta orkuver, allar olíulindir og stöðvar þar sem sjó er breytt í drykkjarvatn í Íran, ef Íranir opnuðu ekki strax fyrir siglingar um sundið. Slíkar árásir væru stríðsglæpir.

Marco Rubio, utanríkisráðherra Bandaríkjanna og þjóðaröryggisráðgjafi Trumps, svo eitthvað sé nefnt, sagði í viðtali í gær að Bandaríkjamenn myndu ljúka sér af í Íran á nokkrum vikum. Þá þyrfti að ganga frá málefnum Hormússunds.

Hann sagði að þá myndu Íranir þurfa að taka ákvörðun í því máli eða að hópur ríkja víðs vegar að úr heiminum myndi tryggja að sundið yrði opið.