Inn­leiða gervi­greindina í MS

Í fréttatilkynningu þess efnis segir að MS nýti gervigreind til að styðja kennara í daglegu starfi og hyggist gera það í enn frekari mæli. Meðal annars við undirbúning kennslu, verkefnagerð, endurgjöf og til að einfalda skjalavinnu og upplýsingamiðlun innan skólans. Með innleiðingu og notkun Vitans öðlist MS fullt eignarhald á gögnum og þeim gervigreindarlausnum sem þar verða þróaðar.

Markviss og örugg notkun

„Tilgangur samningsins er að tryggja markvissa og örugga notkun gervigreindar innan menntaskólans og skapa traustan ramma utan um tæknina til að styðja við nám, kennsluþróun og daglegt starf. Við viljum að bæði nemendur og starfsfólk geti notað gervigreindina með uppbyggilegum hætti í hvetjandi og skapandi umhverfi. Það skiptir okkur líka lykilmáli að innleiðing á heildrænni lausn af þessu tagi tryggir að nemendur og starfsfólk hafa jafnan aðgang að sameiginlegu umhverfi gervigreindar og jafnframt áreiðanlegum verkfærum,“ er haft eftir Leifi Inga Vilmundarsyni, konrektor Menntaskólans við Sund.

Sprotasjóður styrkti verkefnið

Upphaf verkefnisins megi reka til þess að MS fékk veglegan styrk frá Sprotasjóði Rannís, en hann styrki verkefni sem stuðla að þróun og nýjungum í skólastarfi í leik-, grunn- og framhaldsskólum.

„Við sjáum tækifæri til að taka jákvæð skref fram á við, jafnt til að bæta þjónustu við nemendur og kenna þeim að beisla gervigreindina og nota hana rétt, með ábyrgum og öruggum hætti. Við höfum til dæmis nú þegar smíðað agent eða snjallmenni, sem aðstoðar við þróun og smíðar á verkefnum fyrir þýskukennslu. Við vonumst til að þessi tækni reynist kennurum okkar öflugur hjálparkokkur,“ bætir Leifur Ingi við.