Setti heims­met í hálfmaraþoni sem fær að standa í þetta sinn

Metið var áður í eigu Yomif Kejelcha frá því í hálfmaraþoninu í Valencia árið 2024.

„Ég er svo glaður að hafa slegið heimsmetið. Eftir fyrstu tíu kílómetrana fann ég að það væri möguleiki. Ég hélt áfram og reyndi svo að bæta í hraðann síðustu tvo kílómetrana“ sagði Kiplimo eftir að hafa sett nýtt heimsmet.

Hann fór fyrstu tíu kílómetrana á 27 mínútum sléttum, sem hefði verið nægur hraði til að klára hálfmaraþon á undir 57 mínútum en á endanum varð Kiplimo 20 sekúndum yfir 57 mínútum. Samkeppnin var hörð en alls fimm keppendur kláruðu hálfmaraþonið á innan við klukkutíma.

Þarna sýndi Kiplimo og sannaði að hann er besti hálfmaraþonhlaupari heims í dag. Heimsmetið var áður í hans eigu, áður en Kejelcha sló það árið 2024.

Árið 2025 hélt Kiplimo að hann hefði endurheimt heimsmetið, þegar hann hljóp hálfmaraþon 56 mínútum og 42 sekúndum, fyrstur í sögunni til að hlaupa hálft maraþon á minna en 57 mínútum.

Tíminn fékk hins vegar ekki að standa því Kiplimo var dæmdur úr leik fyrir að vera of nálægt brautarbílnum, sem er sagt hafa hjálpað honum að stilla sig inn á hraðann.

Heimsmetið er nú aftur komið til hans en Kiplimo á fimm af tólf bestu tímum sögunnar í hálfmaraþoninu.

Næsta markmið hjá honum er að slá brautarmetið í heilu maraþoni í Lundúnum. Kiplimo á næstbesta tíma sögunnar í Lundúnamaraþoninu (2:02:23) en brautarmetið er í eigu Sebastian Sawe (2:02:05).

Heimsmetið í heilu maraþoni setti Kelvin Kiptum (2:00:35) í Chicago árið 2023.