Enski boltinn

Sjáðu Arsenal renna á rassinn gegn Úlfunum

Ágúst Orri Arnarson skrifar
Sjálfsmark í uppbótartíma varð til þess að Arsenal tapaði tveimur stigum í gærkvöld. 
Sjálfsmark í uppbótartíma varð til þess að Arsenal tapaði tveimur stigum í gærkvöld.  Michael Regan/Getty Images

Topplið ensku úrvalsdeildarinnar missteig sig harkalega í gærkvöldi eftir að hafa náð tveggja marka forystu á útivelli. Mörkin úr leik Wolves og Arsenal má sjá hér fyrir neðan.

Klippa: Wolves - Arsenal 2-2

Arsenal er þar með búið að tapa fjórum stigum í síðustu tveimur deildarleikjum sínum og er að gefa Manchester City dauðafæri á að vinna enn frekar á forskoti þeirra á toppnum.

Arsenal hafði tapað stigum á móti Brentford í leiknum á undan og mætti slakasta liði deildarinnar í gær. Úrslitin eru því gríðarlegt áfall.

Arsenal fékk draumabyrjun þegar Bukayo Saka skallaði boltann í markið strax á fimmtu mínútu leiksins eftir fyrirgjöf frá Declan Rice. Þannig var staðan þar til á í upphafi seinni hálfleiks þegar varnarmennirnir Piero Hincapié og Gabriel unnu vel saman. Gabriel kom boltanum á vinstri bakvörðinn og Hincapié skoraði laglega.

Úlfarnir áttu aftur á móti svar og Hugo Bueno minnkaði muninn í 2-1 aðeins fimm mínútum síðar með skoti fyrir utan teig.

Liðið vann sig vel inn í leikinn eftir erfiða byrjun og stríddi toppliðinu það sem eftir var leiksins.

Úlfarnir uppskáru síðan jöfnunarmark í uppbótartímanum þegar skot Tom Edozie fór af Riccardo Calafiori og í eigið mark. Þeir sem áttu þó mesta sök á því voru David Raya og Gabriel sem voru afar klaufalegir eftir fyrirgjöf og boltinn datt fyrir Edozie.

Arsenal hafði verið að tefja í aðdraganda jöfnunarmarksins og tókst ekki að skipta aftur í sóknargírinn og sækja sigur. Niðurstaðan er því tvö töpuð stig á móti lélegasta liði deildarinnar.




Fleiri fréttir

Sjá meira


×