Reykja­víkur­mara­þonið eignast systur í Pittsburgh

Þetta kemur fram í tilkynningu frá Íþróttabandalagi Reykjavíkur og Íslandsbanka, sem halda Reykjavíkurmaraþonið á hverju ári og í fertugasta sinn í fyrra.

Pittsburgh maraþonið fer fram þann 3. maí næstkomandi en Reykjavíkurmaraþon Íslandsbanka fer að venju fram samhliða menningarnótt eða laugardaginn 22. ágúst.

„Grunnurinn að báðum hlaupum snýr að því að leiða gott af sér og stuðla að heilbrigðum lífstíl. Með þessu samstarfi gefst okkur tækifæri til að efla Reykjavíkurmaraþon Íslandsbanka á alþjóðlegum vettvangi og bjóða upp á nýja hlaupaupplifun í leiðinni,” segir Hrefna Hlín Sveinbjörnsdóttir, hlaupastýra Reykjavíkurmaraþonsins.

Í tilkynningunni segir að Reykjavíkurmaraþonið bjóði hlaupurum einstakt tækifæri til þess að hlaupa í nyrstu höfuðborg heims um götur Reykjavíkur þar sem íbúar og sjálfboðaliðar setja mark sitt á stemninguna.

Maraþonið í Pittsburgh býður upp á frábrugðið umhverfi sem býr yfir mikilli sögu og menningu.

Hlaupin eiga það helst sameiginlegt hvað varðar stemninguna og menninguna sem hefur myndast í kringum maraþonin en íbúar heilu hverfanna bæði í Reykjavík og Pittsburgh flykkjast út á göturnar til að hvetja og styðja við hlaupara.

„Fyrir hlaupara sem elska að ferðast opnar þetta samstarf á möguleikann á ógleymanlegri hlaupaupplifun. Um er að ræða tvö mjög ólík hlaup í tveimur fallegum borgum sem bæði hafa mikinn karakter,” segir Troy Schooley, framkvæmdastjóri Pittsburgh-maraþonsins.

„Samstarfið skapar ekki aðeins tengsl í hlaupasamfélaginu heldur vekur einnig athygli á Reykjavík sem framúrskarandi áfangastað fyrir hlaupara,” segir Kristján Bjarki Jónasson, verkefnastjóri hjá Visit Reykjavík sem kemur einnig að samstarfinu.