Fá veg­legan styrk og inn­leiða Bara tala í alla fram­halds­skóla

Í fréttatilkynningu þess efnis frá Bara tala segir að verkefnið sé unnið í nánu samstarfi við Tækniskólann, Verzlunarskóla Íslands, Verkmenntaskóla Austurlands og Framhaldsskólann á Húsavík og hafi það að markmiði að brúa bilið milli tungumálanáms og fagnáms á framhaldsskólastigi.

Í dag séu yfir 160 stafræn námskeið í boði í Bara tala, þar sem lögð sé áhersla á starfstengt íslenskunám og íslensku sem nýtist í daglegu lífi. Verkefnið felist í þróun stafræns náms- og fagorðaforða sem geri nemendum kleift að tileinka sér íslensku í beinu samhengi við nám sitt, hvort sem um sé að ræða bóknám, tæknigreinar eða verklegt iðnnám. Með því að samþætta íslenskuna beint inn í fagnám nemenda, í stafrænu og aðgengilegu formi, er brugðist við einni helstu áskorun aðfluttra nemenda í framhaldsskólum, þar sem íslenskunámið hafi oftar verið hliðstætt náminu fremur en samofið því.

Níu prósent af erlendum uppruna

Samkvæmt gögnum frá Hagstofu Íslands hafi um níu prósent framhaldsskólanema árið 2024 verið af erlendum uppruna og hlutfallið sé víða enn hærra innan einstakra námsbrauta. Fyrir þennan hóp geti skortur á sérhæfðum námsorðaforða orðið raunveruleg hindrun í námi, jafnvel þegar áhugi, hæfni og vilji til náms eru til staðar. Þörfin á hagnýtum og markvissum námsstuðningi sé því mikil, sérstaklega stuðningi sem geri nemendum kleyft að skilja námsefni, taka virkan þátt í kennslustundum og byggja upp sjálfstraust í notkun íslensku.

„Í nýlegri úttekt OECD á stöðu innflytjenda á Íslandi er íslenskan sögð lykilforsenda inngildingar í samfélaginu, bæði í menntakerfinu og á vinnumarkaði. Þar kemur fram að aðeins um 18% innflytjenda á Íslandi segjast hafa góða kunnáttu í íslensku, sem er lægsta hlutfall meðal OECD-ríkja. Skortur á íslenskukunnáttu er jafnframt ein helsta ástæða þess að fólk nýti ekki menntun sína og færni til fulls. OECD leggur áherslu á að efla þurfi aðgengilegt, sveigjanlegt og hagnýtt íslenskunám sem tengist beint námi, starfi og daglegu lífi, þar sem stafrænar lausnir á borð við Bara tala gegna lykilhlutverki.“

Hluti af heildstæðu átaki

Þá segir að úthlutun styrksins falli að þessari stefnumörkun og sé hluti af heildstæðu átaki stjórnvalda til að efla íslensku sem annað tungumál. Mennta- og barnamálaráðherra hafi nýlega úthlutað tæplega 200 milljónum króna til sautján aðila sem vinni að nýjungum í íslenskunámi innflytjenda. Úthlutunin byggi á stefnuyfirlýsingu ríkisstjórnarinnar, menntastefnu til 2030 og þingsályktun um aðgerðaáætlun í málefnum íslenskrar tungu fyrir árin 2024–2026, þar sem lögð sé áhersla á nýjar leiðir til að tryggja jafnt aðgengi að íslenskunámi.

Í úthlutunarferlinu hafi verið lögð sérstök áhersla á samstarfsverkefni sem hafi burði til almennrar dreifingar. Með samstarfi framhaldsskólanna fjögurra og Bara tala verði til öflugt samstarfsnet sem styrki íslenskuna þvert á skólastig og námssvið. Verkefnið sé því ekki aðeins þróunarverkefni fyrir afmarkaðan hóp heldur fyrirmynd að lausn sem hægt verði að innleiða víðar innan skólakerfisins.