Spenna vegna nýs mats á stærð loðnu­stofnsins

Í fréttum Sýnar var fjallað um loðnuna sem í meira en hálfa öld verið næstmikilvægasti nytjastofn Íslendinga, á eftir þorskinum, það er að segja ef ekki er loðnubrestur. En einmitt vegna þess hve loðnan er dyntótt og veiðitíminn skammur er talið afskaplega mikilvægt á þessum árstíma að kortleggja vel loðnugöngurnar og stærð þeirra.

Mynd Hafrannsóknastofnunar sýnir siglingaferla þeirra fimm skipa sem tóku þátt í loðnuleitinni í síðustu viku, sem voru tvö hafrannsóknaskip og þrjú veiðiskip frá útgerðinni. 

Menn voru sérstaklega áhugasamir að sjá hvar hlykkir komu á ferlana því það þýddi að þar sást á bergmálsmælum nægilega mikið af loðnu til að setja út troll til sýnatöku. Slíkir hlykkir sáust víða, eins og undan Suðausturlandi, undan Langanesi, norður af Húnaflóa og út af Horni.

Kort sem Hafrannsóknastofnun birti svo á sunnudag sýndi svo betur þéttleika loðnunnar sem mældist. Stærsta loðnutorfan sást í fremsta hluta loðnugöngunnar undan sunnanverðum Austfjörðum. Fleiri torfur sáust út af Austfjörðum en einnig stórar torfur norður af Húnaflóa. 

Þessi mynd varð til þess að hlutabréfaverð í þremur sjávarútvegsfyrirtækjum sem stunda loðnuveiðar hækkuðu á mánudag um allt að fimm prósent.

Spennan er væntanlega mest í þeim bæjum landsins sem eiga mest undir loðnuveiðum.  Vestmannaeyjar eru stærsta verstöðin og Norðfjörður númer tvö en loðnuvinnslur eru einnig á Þórshöfn, Vopnafirði, Eskifirði, Fáskrúðsfirði, Hornafirði og á Akranesi. Á öllum þessum stöðum má búast við mikilli tekjuinnspýtingu ef loðnukvótinn verður aukinn að einhverju ráði.

Loðnubæjunum hefur fækkað um einn frá því í fyrra. Seyðisfjörður er dottinn út eftir að bræðslunni þar var lokað.

Búist er við að Hafrannsóknastofnun tilkynni niðurstöður sínar á morgun. Miðað við núverandi kvóta stefnir í allt að tíu milljarða króna loðnuvertíð. Það eru ekki mörg ár síðan við fengum fimmtíu milljarða vertíð þannig að miklir hagsmunir eru undir að meira finnist, eins og fjallað er um í frétt Sýnar: