McGinn út­skýrir furðu­lega fagnið: „Smá grín hjá okkur í klefanum“

Skoski miðjumaðurinn skoraði tvö mörk í sigrinum og líður greinilega vel gegn Nottingham Forest því hann hefur aðeins tvisvar skorað tvennu fyrir Aston Villa en í bæði skiptin var það gegn liðinu úr Skírisskógi.

McGinn fagnaði fyrra markinu með því að láta eins og tröllkarl, hokinn í baki og með hendurnar út steig hann þung skref, sem hann segir vera einkahúmor hjá leikmönnum liðsins.

„Þetta er smá grín hjá okkur í klefanum. Ég veit ekki hversu mikið ég má segja um þetta“ sagði McGinn í viðtali við Sky Sports léttur í bragði.

„Þetta snerist um að stjórinn [Unai Emery] hefur oft talað um að taka eitt skref í einu, þannig að ég var að vísa til þess. Hann vildi líka sjá meiri ákefð, sjá mig fara meira inn á teiginn og sem betur fer gerði ég það.“

Sigurinn var mikilvægur fyrir Aston Villa eftir slæmt tap í síðustu umferð og kom fjólubláa liðinu upp í annað sæti deildarinnar.

„Þetta var hrikaleg frammistaða í síðasta leik og við vildum svara fyrir það, kannski var þetta upphafið að annarri ellefu leikja sigurgöngu. Við sjáum til.“

Mark og fagn McGinn má sjá í spilaranum að ofan.