Úlfarnir heiðruðu minningu Jota

Valur Páll Eiríksson skrifar 27. desember 2025 14:00

José Sá, landi Jota og fyrrum liðsfélagi hans hjá Wolves, leggur blóm að minnisvarðanum líkt og Rob Edwards, þjálfari liðsins. Mynd/Wolves

Leikmenn og starfsfólk Wolverhampton Wanderers fóru saman að minnisvarða Diogo Jota, fyrrum leikmanns liðsins, við Anfield í Liverpool í gær. Liðin eigast við í dag.

Úlfarnir heimsækja Liverpool á Anfield í dag en Jota, sem lést ásamt bróður sínum í bílslysi í sumar, fór frá Wolves til Liverpool á sínum tíma.

We visited Anfield this evening to remember Diogo 💛 pic.twitter.com/hr4Z8UXMkp
— Wolves (@Wolves) December 26, 2025

Jota lék með Wolves frá 2017 til 2020 eftir skipti frá Atlético Madrid á Spáni og skoraði 44 mörk í 131 leik fyrir liðið. Frammistaða hans með þeim appelsínugulu kallaði á áhuga Liverpool sem keypti kappann sumarið 2020.

Minning Jota verður sérstaklega heiðruð í leik dagsins en Liverpool hefur þegar lagt treyju hans, númer 20, til hliðar og má enginn klæðast númerinu aftur fyrir félagið. Þá hafa stuðningsmenn liðsins sungið lag til heiðurs Jota á 20. mínútu allra leikja liðsins í haust.

Synir Jota munu þá leiða leikmenn inn á völlinn í dag, þeir Dinis og Duarte Jota, sem eru tveggja og fjögurra ára gamlir.

Liverpool og Wolves mætast klukkan 15:00 og leikurinn verður sýndur beint á Sýn Sport 2.