Teitur fer á EM sem hornamaður í stað Sigvalda

Óskar Ófeigur Jónsson skrifar 18. desember 2025 13:09

Ýmir Örn Gíslason er í íslenska hópnum þrátt fyrir að Logi Geirsson og Kári Kristján Kristjánsson hafi ekki valið hann í hópana sína. Vísir/Vilhelm

Sigvaldi Björn Guðjónsson er ekki í íslenska EM-hópnum sem tilkynntur var með viðhöfn í Arion-banka í dag en Evrópumótið hefst 15. janúar næstkomandi.

Snorri Steinn Guðjónsson, þjálfari íslenska karlalandsliðsins í handbolta, tilkynnti í dag hvaða átján leikmenn verða með íslenska landsliðinu á Evrópumótinu í Svíþjóð, Danmörku og Noregi.

Þetta er þriðja stórmót Snorra með liðið en fjórtánda Evrópumótið í röð þar sem Ísland er meðal þátttökuþjóða.

Snorri hafði áður valið 35 manna úrvalshóp en nú valdi hann þá leikmenn sem munu taka þátt í mótinu fyrir Íslands hönd.

Af þeim átján sem Snorri valdi fyrir heimsmeistaramótið í fyrra eru fimmtán aftur með í ár. Það eru allir nema þeir Aron Pálmarsson og Sigvaldi Björn Guðjónsson. Þorsteinn Leó Gunnarsson er ekki meðal þessara átján sem voru valdir í dag en er á bakvakt með markverðinum Einari Baldvin Baldvinssyni.

Þorsteinn er að glíma við meiðsli en er að koma til baka. Ef æfingar ganga vel þá mun hann fara út sem nítjándi maður í hópnum.

Sigvaldi Björn Guðjónsson var búinn að vera með á sjö stórmótum í röð með íslenska landsliðinu eða öllum mótum frá og með HM 2019. Aron Pálmarsson lagði svo skóna á hilluna eftir síðasta tímabil.

Landsliðið kemur saman til æfinga hér á landi 2. janúar næstkomandi. Áður en liðið fer á Evrópumótið mun liðið spila við Slóveníu í undanúrslitum á æfingamóti í París í Frakklandi og mæta svo annaðhvort Frakklandi eða Austurríki í hinum leiknum.