Vara við af­leiðingum sam­særis­kenninga eftir skot­á­rás á heil­brigðis­stofnun

Lögreglumaður lét lífið þegar þrítugur karlmaður hóf skothríð á fjórar byggingar Sjúkdómavarnastofnunar Bandaríkjanna (CDC) í Atlanta í Georgíu síðdegis á föstudag. Alls skaut maður um 180 skotum og braut á annað hundrað rúður í byggingunum sem hýsa skrifstofur stofnunarinnar, að sögn AP-fréttastofunnar.

Árásarmaðurinn lést af völdum skotsára en ekki hefur verið gefið út hvort að hann svipti sig sjálfur lífi eða hvort að lögreglumenn hafi skotið hann. Hann er sagður hafa verið sannfærður um bóluefni gegn Covid-19 hafi gert hann þunglyndan og skapað hjá honum sjálfsvígshugsanir. Bóluefnin yllu öðrum einnig skaða en yfirvöld hylmdu yfir það.

Stjórnendur CDC sögðu starfsmönnum á fjarfundi um helgina að árásin hefði verið markviss og að yfirlögðu ráði. Heimilidarmenn Washington Post innan stofnunarinnar segja að lögregla telji að skoðanir mannsins á bóluefnunum hafi verið tilefni árásarinnar.

Lögregla gengur út frá að árásarmaðurinn hafi verið veikur eða talið sig vera það. Lyf við geðklofa fundust við húsleit á heimili hans, að sögn CNN-fréttastöðvarinnar. Nágranni árásarmannsins sagði staðarfjölmiðli í Atlanta að hann hefði ítrekað borið upp vantraust sitt á bóluefnum gegn Covid-19 í samtölum.

Spurningar um ábyrgð heilbrigðisráðherrans

Stoðlausar samsæriskenningar um öryggi bóluefnanna gegn Covid-19 hafa lengi verið á sveimi en Robert F. Kennedy yngri, heilbrigðisráðherra Bandaríkjanna, hefur verið einn helsti talsmaður þeirra. Hann hefur meðal annars kallað bóluefnin „banvænustu bóluefni sem framleidd hafa verið“.

Í sömu viku og árásin átti sér stað tilkynnti hann að Bandaríkjastjórn ætlaði að hætta að fjármagna þróun svonefndra mRNA-bóluefna en þau hafa verið sérstök þráhyggju samsæriskenningasmiða eins og hans.

Skotárásin hefur því vakið upp spurningar um ábyrgð Kennedy og annarra samsæriskenningasmiða. Margir starfsmenn CDC eru sagðir reiðir Kennedy og Donald Trump forseta, að sögn Washington Post. Trump hefur ekki fordæmt árásina og Kennedy þykir hafa brugðist seint og illa við.

„Enginn ætti að verða fyrir ofbeldi þegar hann vinnur að því að vernda heilsu annarra,“ sagði Kennedy í yfirlýsingu um árásina.

Einn fyrrverandi starfsmaður CDC segir AP að áralöng rangindi um bóluefni og lýðheilsu hafi hlotið að hafa áhrif á geðheilsu fólks og „leiða til ofbeldis“ á endanum.

Annar sagði Washington Post að bein tengsl væru á milli rógsins um CDC í kórónuveirufaraldrinum og vísvitandi lyga og upplýsingafals sem héldi áfram fram á þennan dag.

„Margir þeirra sem eru uppsprettur þessara lyga eru nú með ræðupúltið og sveipaðir virðugleika embætta innan ríkisstjórnarinnar,“ sagði starfsmaðurinn.

„Við verðum að gera okkur grein fyrir að fólk er að hlusta. Þegar þú fullyrðir hluti um öryggi og virkni bóluefna sem hefur ítrekað verið sýnt fram á að séu rangir getur það haft óviljandi afleiðingar,“ sagði Jerome Adams, fyrrverandi landlæknir Bandaríkjanna á fyrra kjörtímabili Donalds Trump forseta.