Man City ræður annan úr teymi Klopp hjá Liver­pool

Hinn 42 ára gamli Lijnders hóf störf hjá Liverpool árið 2014 þegar Brendan Rodgers var aðalþjálfari liðsins. Hann starfaði fyrir félagið til ársins 2018 þegar hann tók við þjálfun NEC Nijmegen í efstu deild Hollands.

Hollendingurinn entist stutt í starfi og var ráðinn til Liverpool á ný þegar liðið þurfti að finna aðstoðarmann eftir að Zeljko Buvac sagði starfi sínu lausu árið 2019. Lijnders starfaði svo fyrir Klopp allt þangað til sá þýski hætti sem þjálfari Liverpool. Þá tók Hollendingurinn við Red Bull Salzburg sem spilar í efstu deild Austurríkis.

Lijnders entist aðeins 29 leiki sem aðalþjálfari. Það virðist sem það liggi betur fyrir honum að vera aðstoðarþjálfari hefur Guardiola ákveðið að fá Hollendinginn til liðs við sig eftir dapurt tímabil í Manchester-borg.

Guardiola er þekktur fyrir að hrista vel upp í starfsliði sínu sem og leikmannahópi þegar þess þarf. Nú þegar hefur verið staðfest að vinstri bakvörðurinn Rayan Aït-Nouri sé genginn til liðs við félagið frá Úlfunum og reikna má með frekari kaupum, og sölum, áður en tímabilið 2025-26 hefst.

Þá hefur breska ríkisútvarpið greint frá því að Man City sé komið með nýjan þjálfara sem mun sérhæfa sig í föstum leikatriðum. Sá heitir James French og hóf störf hjá Liverpool árið 2012. Hann sá um að greina mótherja Liverpool en tekst nú á við talsvert öðruvísi verkefni hjá Man City.