Enski boltinn

Aït-Nouri fyrstur inn um dyrnar hjá Man City

Runólfur Trausti Þórhallsson skrifar
Rayan Aït-Nouri skoraði 4 mörk og gaf 7 stoðsendingar í 37 deildarleikjum á síðustu leiktíð.
Rayan Aït-Nouri skoraði 4 mörk og gaf 7 stoðsendingar í 37 deildarleikjum á síðustu leiktíð. Manchester City

Manchester City hefur fest kaup á fyrsta leikmanni sumarsins. Sá heitir Rayan Aït-Nouri og kemur frá Úlfunum.

Aït-Nouri er sóknarþenkjandi vinstri bakvörður svo það má ætla að Pep Guardiola, þjálfari Man City, ætli sér ekki að spila með fjóra miðverði í öftustu línu á komandi leiktíð.

Hinn 24 ára gamli Aït-Nouri átti aðeins eitt ár eftir af samningi sínum við Úlfana og hafði gefið til kynna að hann myndi ekki skrifa undir framlengingu á samningi sínum. Því má segja að hann sé heldur ódýr ef marka kaup stærstu liða Evrópu undanfarin misseri.

Man City greiðir 35 milljónir punda eða rétt rúma sex milljarða fyrir bakvörðinn knáa. Hann skrifar undir fimm ára samning.

Reikna má með að vinstri bakvörðurinn komi við sögu strax í júní þegar Man City tekur þátt á HM félagsliða sem fram fer í Bandaríkjunum. Lærisveinar Guardiola eru í riðli með Al Ain, Juventus og Wydad AC.

Fótbolti Enski boltinn

Mest lesið


Fleiri fréttir

Sjá meira


×

Mest lesið