Rússar sagðir vilja draga við­ræður á langinn

Rússneskir ráðamenn eru sagðir vilja draga viðræðurnar á langinn.

Á meðan á fundinum stóð í Sádi-Arabíu, þar sem úkraínsk sendinefnd hefur einnig átt í viðræðum við Bandaríkjamenn, skutu Rússar öflugri skotflaug að skóla og sjúkrahúsi í Súmí í Úkraínu. Að minnsta kosti 74 særðust í árásinni.

Sjö létu lífið í drónaárásum síðust nætur.

Utanríkisráðherra Úkraínu segir að í stað þess að senda út innihaldslausar yfirlýsingar um frið þurfi Rússar að hætta árásum á óbreytta borgara í Úkraínu.

Enn sem komið er liggur ekki fyrir hvort fundir dagsins og gærdagsins skiluðu árangri. Heimildarmaður Reuters í Rússlandi segir að til standi að senda út yfirlýsingu á morgun. Þá hafa rússneskir miðlar eftir talsmanni Vladimírs Pútín, forseta Rússlands, að ekki hafi verið skrifað undir neitt í dag.

Vólódímír Selenskí, forseti Úkraínu, segist eiga von á frekari upplýsingum um viðræður dagsins. Friður sé nauðsynlegur Úkraínu, Evrópu, Bandaríkjunum og heiminum öllum. Hann þurfi þó að vera varanlegur og eins og staðan er núna segir Selenskí Rússa þá einu sem standa í vegi hans.

Hann segir að til að koma á friði þurfi að auka þrýstinginn á Rússa og það með refsiaðgerðum og frekari stuðningi við Úkraínumenn, auk alþjóðlegrar samvinnu.

Pútín hafnaði nýverið tillögu Donalds Trump, forseta Bandaríkjanna, um almennt þrjátíu daga vopnahlé í Úkraínu. Fyrir á að liggja samkomulag um að stöðva árásir á orkuinnviði í Úkraínu og árásir á olíuvinnsluinnviði í Rússlandi.

Árásir hafa þó haldið áfram.

Sjá einnig: Segir orkuinnviðasamkomulagið enn í gildi þrátt fyrir stöðugar árásir

Eins og áður segir hafa viðræður síðustu daga snúist um vopnahlé á Svartahafi en tiltölulega lítið hefur gengið þar á að undanförnu. Rússar hafa flutt sín herskip í var og siglingar til og frá Úkraínu eru næstum því jafn tíðar og þær voru fyrir innrás, samkvæmt frétt Reuters.

Ráðamenn í Evrópu draga í efa að Pútín hafi áhuga á að láta af kröfum sínum að einhverju leyti.

Sjá einnig: Segist opinn fyrir vopna­hléi en hafnar til­lögu Trumps

Meðal þeirra krafna sem ráðamenn í Rússlandi hafa opinberað vegna innrásarinnar í Úkraínu er að fá fjögur héruð Úkraínu, sem þeir stjórna ekki að fullu, auk Krímskaga, að Úkraína afvopnist, fái ekki inngöngu í NATO og jafnvel það að NATO hörfi alfarið frá Austur-Evrópu.

Héruðin fjögur eru Luhansk og Dónetsk, sem Rússar stjórna að stórum hluta, og Kherson og Saporisíja, sem Rússar stjórna mun smærri hluta af. 

Kröfurnar fela í raun í sér uppgjöf Úkraínu og varnarleysi í framtíðinni.

Vilja leggja meira undir sig

Moscow Times hefur eftir heimildarmönnum sínum innan stjórnsýslu Rússlands að þar á bæ vilji menn draga úr viðræðum og reyna að nota tímann til að leggja undir sig stærri hluta af Úkraínu.

Vonast sé til þess að Trump muni ekki reyna að halda aftur af þeim og að hann gæti jafnvel krafist þess að Úkraínumenn hörfi frá þeim héruðum sem Rússar sækjast eftir. Einn heimildarmaður miðilsins sagði Pútín ekki geta látið af því markmiði sínu að stjórna þessum héruðum eftir að hafa gert þau að rússnesku svæði samkvæmt stjórnarskrá ríkisins.

Einnig komi til grein að sækja fram annarsstaðar í Úkraínu og reyna að nota það svæði í viðræðum um Kherson og Saporisíja sérstaklega.