Að­stoðar­menn ráð­herra þurfa nú að líta í kringum sig

Nýjustu fréttir af aðstoðarmönnum eru frá í dag, þær að Lilja Hrund Lúðvíksdóttir hafi verið ráðin aðstoðarmaður Þórdísar Kolbrúnar Reykfjörð Gylfadóttur utanríkisráðherra. Konráð Guðjónsson var aðstoðarmaður Þórdísar og fór með henni yfir í fjármálaráðuneytið þar sem Þórdís staldraði stutt við. Fljótlega eftir að Þórdís færði sig aftur yfir í utanríkisráðuneytið var Konráð ráðinn efnhagsráðgjafi ríkisstjórnarinnar. Fyrir var Inga Hrefna Sveinbjarnardóttir aðstoðarmaður Þórdísar.

Reglulega er nefnt að kerfið hafi blásið út undanfarin árin, í tíð þeirrar ríkisstjórnar sem nú er á lokametrunum. Víst er að ráðherraembættin hafa aldrei verið jafn mörg og þau eru nú, eða tólf talsins, og því ljóst að aðstoðarmenn ráðherra hafa aldrei verið fleiri en nú eða tuttugu og fjórir talsins. Þar við bætast þrír sérlegir aðstoðarmenn ríkisstjórnarinnar. Þó svo að almenningur borgi launin þarf ekki að auglýsa þessar stöður sérstaklega heldur eru aðstoðarmennirnir valdir af hverjum ráð­herra fyrir sig. 

Aðstoðarmenn ráðherra eru oftar en ekki valdir með það fyrir augum að um sé að ræða undirbúning fyrir frama á pólitískum vettvangi. Um það eru mörg dæmi og er þá leitað innan flokkanna eftir fólki. Hvað aðstoðarmenn gera er eflaust breytilegt eftir hverjum ráðherra um sig en launin eru rúmlega 1,5 milljón króna á mánuði sem er vel yfir meðallaunum á Íslandi.

Konungur aðstoðarmannanna er Bjarni sjálfur

Konungur aðstoðarmannanna eðli máls samkvæmt er Bjarni Benediktsson forsætisráðherra. Sérlegir aðstoðarmenn hans eru Hersir Aron Ólafsson og Áslaug Friðriksdóttir. Aðstoðarmenn ríkisstjórnarinnar, sem hafa þá aðstöðu innan forsætisráðuneytisins eru Dagný Jónsdóttir, Áslaug María Friðriksdóttir og Anna Lísa Björnsdóttir sem bættust í hópinn í Stjórnarráðinu í tíð Katrínar Jakobsdóttur. Áslaug var þá ráðin aðstoðarmaður Bjarna þegar hann tók við sem forsætisráðherra.

Guðrún Hafsteinsdóttir sótti fast að fá setu við ríkisstjórnarborðið, hún fékk það og varð dómsmálaráðherra. Vék þá Jón Gunnarsson og hans aðstoðarmenn. Aðstoðarmenn Guðrúnar eru þau Árni Grétar Finnsson og Björg Ásta Þórðardóttir.

Sigurður Ingi Jóhannsson ætlar að sitja áfram sem fjármálaráðherra í starfsstjórn. Og þá aðstoðarmenn hans einnig sem eru Ingveldur Sæmundsdóttir og Sigtryggur Magnason sem hefur unnið sér það til frægðar að vera helsti slagorðasmiður Framsóknarflokksins. Hann er eflaust með höfuðið í bleyti nú um stundir: „Er ekki bara best að kjósa Framsókn“ er til að mynda úr hans smiðju.

Þessir aðstoðarmenn fá gálgafrest

Áslaug Arna Sigurbjörnsdóttir er háskóla-, iðnaðar- og nýsköpunarráðherra og hún er eins og aðrir ráðherrar með tvo aðstoðarmenn. Andri Steinn Hilmarsson er annar sem ráðinn var inn tímabundið í stað Eydísar Örnu Líndal, sem er í fæðingarorlofi. Hin er Áslaug Hulda Jónsdóttir.

Willum Þór Þórsson situr sem fastast sem heilbrigðisráðherra og hans aðstoðarmenn eru Sigurjón Jónsson og Sonja Lind Estrajher Eyglóardóttir. Þau geta farið að pakka en fá gálgafrest meðan starfsstjórnin er að verkum og í raun verða þau á launum þar til tekst að mynda nýja ríkisstjórn, sem enginn veit hvað tekur langan tíma. Frá þeim tíma tekur við þriggja mánaða uppsagnarfrestur.

Lilja Dögg Alfreðsdóttir hefur gengt ráðuneyti sem heitir menningar- og viðskiptaráðuneyti. Hún er með tvo aðstoðarmenn, þau Hafþór Eide Hafþórsson og Jóhönnu Hreiðarsdóttur. Þau bíða nú á kantinum þess sem verða vill.

Mennta- og barnamálaráðherra er svo Ásmundur Einar Daðason. Hann eins og aðrir er með tvo aðstoðarmenn sem gætu verið farnir að líta í kringum sig eftir nýju starfi: Kristjana Arnardóttir, sem nýverið lét af störfum sem íþróttafréttmaður RÚV til að aðstoða ráðherra en hún kom í stað Sóleyjar Ragnarsdóttur, og svo er Teitur Erlingsson.

Guðlaugur Þór Þórðarson umhverfis-, orku- og loftslagsráðherra er með tvo aðstoðarmenn og eru þeir Unnur Brá Konráðsdóttir sem áður var forseti Alþingis fyrir hönd Sjálfstæðisflokksins og svo Steinar Ingi Kolbeins.

Þessir aðstoðarmenn þurfa að pakka strax

Víkur þá loks sögunni að aðstoðarmönnum ráðherra Vinstri grænna en eins og fram hefur komið eru þeir ráðherrar nú óbreyttir þingmenn og aðstoðarmenn þeirra fá þrjá mánuði til að finna sér nýtt starf. Svandís Svavarsdóttir formaður flokksins var í gær innviðaráðherra en eins og fram kom í fréttum í gær var hún í óðaönn við að pakka í sinni skrifstofu. 

Þar var hún að rogast með þunga kassa en aðstoðarmennina var hins vegar hvergi að sjá. Þau eru Kári Gautason og Iðunn Garðarsdóttir.

Guðmundur Ingi Guðbrandsson var þar til í gær félags- og vinnumarkaðsráðherra. Aðstoðarmenn hans voru Bjarki Þór Grönfeldt og Guðrún Ágústa Guðmundsdóttir og þau eru líkast til nú í þessum töluðum orðum að hjálpa honum að taka saman í kassa.

Og að endingu er það þriðji ráðherra Vinstri grænna, matvælaráðherrann Bjarkey Olsen. Hún var eins og aðrir ráðherrar með tvo aðstoðarmenn sem nú aðstoða hvorki einn né neitt. Því ráðherrar Vinstri grænna eru hættir, farnir og taka ekki lengur þátt í þessu asnalega leikriti, eins og segir í leikbókmenntunum. Bjarki Hjörleifsson er aðstoðarmaður Bjarkeyjar ásamt Pálínu Axelsdóttur Njarðvík.

Auk þessara aðstoðarmanna sem hér hafa verið nefndir til sögunnar er starfandi í ráðuneytunum heill her ráðgjafa, lögfræðinga, upplýsingafulltrúa og sérfræðinga. Þeir eru hins vegar ráðnir beint til ráðuneytanna meðan aðstoðarmennirnir koma og fara allt eftir því hvernig hinir pólitísku vindar blása.