Gagn­rýna af­nám greiðslu sér­eignar­sparnaðar inn á hús­næðis­lán

Sigurður Ingi Jóhannsson fjármálaráðherra mælti fyrir fjárlagafrumvarpi næsta árs á Alþingi í dag. Hann segir frumvarpið styðja við hjöðnun verðbólgu og lækkun vaxta án þess að stjórnvöld boði kollsteypur í ríkisfjármálunum með miklum niðurskurði eða skattahækkunum.

„Í fjárlagafrumvarpi er áhersla lögð á að skapa svigrúm til að forgangsraða verkefnum. Þannig verður dregið úr ríkisumsvifum. Staða ríkissjóðs styrkt og unnið gegn þenslu og verðbólgu í hagkerfinu. Það er forðast að grípa til aðgerða sem leitt geta til þjónustuskerðingar eða verri lífskjara ákveðinna hópa,“ segir Sigurður Ingi.

Kristrún Frostadóttir formaður Samfylkingarinnar segir ríkisstjórnina koma sér undan því að taka á málunum. Það væri auðvelt að fría sig ábyrgð þegar komi að því að fjármagna hlutina.

„Því það er bara vinsælt að tala um hvað þú ætlar að gefa öðru fólki en ekki hvað það kostar. Það er ástæðan fyrir því að við erum í þessu ástandi í dag með verðbólgu og vexti. Vegna þess að fólk treystir sér ekki til að vera hreinskilið við fólk þarna úti um að það kostar að ráðast í ákveðnar aðgerðir,“ sagði formaður Samfylkingarinnar meðal annars við umræðuna í dag.

Andrés Ingi Jónsson þingmaður Pírata tók í svipaðan streng og rifjaði upp umsögn BSRB við síðasta fjárlagafrumvarp ríkisstjórnarinnar.

„Þá var tekið saman að ófjármagnaðar skattalækkanir núverandi ríkisstjórnar væru komnar upp í 54 milljarða á ári. Það eru ekki skattalækkanir sem renna beint í vasa fátækasta fólksins í landinu okkar,“ sagði Andrés Ingi.

Þorbjörg Sigríður Gunnlaugsdóttir þingmaður Viðreisnar gagnrýnir að á næsta ári eigi að afnema almenna heimild fólks til að nýta séreignarsparnað til að greiða niður höfuðstól húsnæðislána. Aðgerðin sé sérstök í einu lengsta verðbólgutímabili sem sést hafi og þegar vextir séu eins og þekkist í stríðshrjáðum ríkjum.

„Mér finnst þetta bara skrýtin skilaboð til heimilanna akkúrat núna því það munar um minna og mér finnst þetta bara óskynsamleg aðgerð sem stendur að vera að kippa þessu úr sambandi núna þegar virkilega verðbólgin er farin að bíta,“ sagði hún í viðtali í kvöldfréttum Stöðvar 2.

Njáll Trausti Friðbertsson þingmaður Sjálfstæðisflokksins og varaformaður fjárlaganefndar, segist telja mikilvægt að halda úrræðinu opnu fyrir alla áfram.

„Ég held að það sé full þörf á að viðhalda þessu,“ sagði Njáll í fréttatímanum.

Hvað aðgerðir gegn verðbólgu og háum vöxtum snertir sagði Þorbjörg að hallarekstur ríksins knúði meðal annars verðbólguna áfram.

„Við viljum auðvitað sjá ríki taka sér stærra hlutverk í því að ná henni niður,“ sagði hún.

Njáll sagði fjárlagafrumvarpið gera ráð fyrir minni aukningu ríkisútgjalda en undanfarin ár. Hann teldi að verðbólgan næðist niður með aðgerðum ríkisins, vinnumarkaðarins og Seðlabankans.