Tók hvolpinn til baka vegna and­legra veikinda kaupanda

Kaupin áttu sér stað sumarið 2023 en konan kvartaði til nefndarinnar í janúar árið 2024. Þar krafðist konan þess að vera afhentur hvolpur sem hún keypti en var svo tekinn aftur af henni. Til vara gerði hún kröfu um að vera greiddar skaðabætur sem næmu þeirri upphæð sem kostar að flytja inn hund að utan. Úrskurðurinn er hér. 

Fram kemur í úrskurði nefndarinnar að konan hafi keypt hvolpinn í júlí árið 2023 og greitt fyrir hann 350 þúsund krónur. Tæpum mánuði síðar kom ræktandinn heim til hennar til að kanna aðstæður hvolpsins en tók hann aftur vegna þess að hann taldi aðstæður ekki nægilega góðar fyrir hann. Ræktandinn endurgreiddi konunni kaupin samdægurs.

Segir hvolpinn hafa búið við slæmar aðstæður

Ræktandinn hefur vísað til þess að ástand hvolpsins hafi ekki verið gott og að hann hafi búið við slæmar aðstæður sökum andlegs ástands sóknaraðila. Ræktandinn hefur til sönnunar lagt fram skjáskot af færslum konunnar sem hún tjáir sig um andlega heilsu. Hún vísar einnig til þess í sínu máli að hvolpurinn hafi verið óöruggur og ljóst að umhverfisþjálfun var ekki sinnt.

Konan segir að hún hafi ekki vitað á þeim tíma að hún hafi mátt neita aðgerðum ræktandans og gerir kröfu um að ræktandinn afhendi henni hvolpinn á ný eða að ræktandinn greiði henni skaðabætur sem nema þeirri upphæð að flytja inn sams konar hvolp að utan, því hún geti ekki keypt hann hér á landi.

Ólögmæt fyrirvaralaus riftun

Kærunefndin kemst að þeirri niðurstöðu að með því að taka hvolpinn og endurgreiða kaupverðið hafi það falið í sér riftunaryfirlýsingu. Þá er bent á að í undirrituðum kaupsamningi komi fram að kaupandi hvolps skuli hugsa vel um hann, kynna sér uppeldi og sækja námskeið ef kostur er.

Nefndin telur þó ræktandann ekki hafa sýnt fram á að konan hafi vanrækt hvolpinn eða með öðrum hætti vanefnt verulega samninginn með þeim hætti sem réttlæti fyrirvaralausa riftun af hálfu varnaraðila. Þá bendir kærunefndin á að ræktandinn rifti kaupunum eftir að konan hafði greitt fyrir hvolpinn að fullu. Með hliðsjón af því telur nefndin að fyrirvaralaus riftun ræktandans á kaupsamningi hafi verið ólögmæt.

Með tilliti til eðlis kaupanna telur nefndin þó ekki að hægt sé að fallast á kröfu um að hvolpinum verði skilað. Það sé ár frá því að hvolpurinn var tekinn af heimilinu. Hvað varðar kröfu um skaðabætur segir nefndin að konan hafi ekki sýnt fram á að tjón sé meira en sem nemur kaupverði og fellst því ekki á þá kröfu heldur.