Telur að nokkrir bíði á­tekta vegna for­sætis­ráð­herra

Hún telur líklegt að ráðherrann láti slag standa en vonar að málið skýrist sem fyrst.

Rúmur mánuður til stefnu

Fólk sem hefur hug á framboði til Forseta Íslands hefur þar til 26. apríl til að bjóða sig fram. Þann annan maí mun landskjörstjórn auglýsa hverjir verða í framboði. Landsmenn ganga síðan til kosninga laugardaginn 1. júní. 

Nú þegar rétt rúmur mánuður er til stefnu liggja margir undir hinum margumrædda feldi og eru sumir hverjir orðnir kófsveittir. Þórhildur Þorkelsdóttir framkvæmdastjóri og almannatengill hjá Brú Strategy telur að biðin tengist Katrínu Jakobsdóttur forsætisráðherra í mörgum tilfellum.

„Ég tel enn líkur á að Katrín fari fram. Hún hefur að minnsta kosti ekki slegið það út af borðinu og það segir okkur allavega það að hún er að hugsa málið upp að einhverju marki og ég held að það séu einhverjir frambjóðendur þarna úti sem hreinlega sitja og bíða eftir hennar ákvörðun svo það verður mjög spennandi að sjá hvað kemur út úr því. Ég vona að það skýrist fyrr en síðar.“

Katrín gæti breytt landslaginu

Þórhildur telur að það myndi gjörbreyta kosningabaráttunni ef Katrín gæfi kost á sér enda sé hún sterkur frambjóðandi.

„Katrín hefur svo gríðarlega margt; hún er mjög reynslumikil, hún er gædd mjög miklum persónutöfrum og, það sem meira er, þá nýtur hún gríðarlegs trausts.“

Allt opið enn og líkur á fleiri frambjóðendum

Þórhildur segir að nú séum við stödd á spennandi tímapunkti í kosningabaráttunni því nú geti hreinlega allt gerst og ekkert sé gefið.

„Það er að teiknast upp mjög spennandi mynd en við megum ekki gleyma því að það er mánuður til stefnu og mánuður er mjög langur tími í þessu samhengi þar sem kosningabaráttan er mjög stutt. Líklega fara fleiri frambjóðendur fram, ég held við getum alveg gefið okkur það. Þannig að þetta er mjög spennandi en á þessum tímapunkti er mjög erfitt að segja til um hver niðurstaðan verður; hver næsti forseti verður, við hreinlega höfum ekki forsendurnar til þess.“

Þórhildur ráðleggur fólki sem liggur undir feldi að vinna heimavinnuna sína vel því það sé mikið í húfi, ekki síst fjárhagslega. Það sé ekki nóg að kanna hljómgrunninn í innsta hring.

„Það er kannski ekki alveg nóg að frændi þinn hvetji þig til að fara fram í páskaboðinu, þó það sé líka frábært, en það er mjög mikilvægt að fara vel út fyrir þína „búbblu“ og kanna hvort það sé raunverulegur grundvöllur fyrir framboði.“

Forsetaframboð dýrt sport

Því framboð kosti sitt og kalli á stöður sem þurfi að manna.

„Þú þarft að ráða kosningateymi, kosningastjóra, kynningarstjóra og fleira og svo má heldur ekki gleyma því að fólk sem fer fram í þessa kosningabaráttu af alvöru, það gerir það í fullu starfi og þitt aðalstarf bíður á meðan þannig að það er beinn tekjumissir þannig að það er dýrt sport að fara í forsetaframboð.“

Ekki lengur einn framboðsfundur og búið

Þórhildur bendir á að til þess að vera sýnilegur þurfi að beita öllum ráðum og öllum mögulegum miðlunarleiðum. Það sé af sem áður var.

„Þau sem ætla að fara í þetta af fullum krafti og af alvöru verða að setja allt annað til hliðar og setja allan kraft í að vera sýnileg og á öllum miðlum. Þetta er ekki lengur bara einhver einn framboðsfundur heldur þarftu að vera mjög vakandi og við erum að sjá það nú þegar og það eru komnar stórar Facebook-grúppur fyrir stuðningsfólk frambjóðendanna.“

Þar myndist líflegar umræður, ýmislegt úr fortíð viðkomandi sé dregið fram í dagsljósið, allt frá afstöðu til Icesave á sínum tíma til ferilskrár. Mörgum finnst tilhugsunin um að sæta slíkri skoðun ekki mjög fýsileg og láta það jafnvel stoppa sig. Þórhildur segir að fólk eigi ekkert að láta minniháttar hluti úr fortíðinni aftra sér.

„Við hreinlega lifum á þannig tímum í dag. Ekkert okkar er fullkomið. Við höfum öll gengið í gegnum ýmislegt og það er hreinlega ekki hægt að fara fram á að fólk hafi aldrei gert nein mistök, það mikilvægasta er að draga lærdóm af því og halda áfram. Fólk ætti ekki að láta það halda aftur af sér ef það er eitthvað eitt sem það er að velta fyrir sér að gæti komið í dagsljósið. Við lifum á tímum mikils upplýsingaflæðis og internetið er auðvitað búið að skrásetja allt sem við gerum; það eru til myndir af okkur öllum síðan í grunnskóla sem allir geta séð og flestir hafa gert misgáfaða hluti. Þetta er okkar raunveruleiki í dag, árið er 2024 og það er bara áfram gakk!“