Sport

Snorri vann sig upp um 85 sæti á HM

Sindri Sverrisson skrifar
Snorri Björnsson, lengst til hægri á mynd, hljóp hraðast Íslendinganna í Austurríki í dag. Þorbergur Ingi Jónsson (til vinstri á mynd) tók einnig þátt í 87 km hlaupinu í dag en Þorsteinn Roy Jóhannsson (fyrir miðju) endaði fremstur íslensku karlanna í 45 km hlaupinu í gær, eða í 73. sæti.
Snorri Björnsson, lengst til hægri á mynd, hljóp hraðast Íslendinganna í Austurríki í dag. Þorbergur Ingi Jónsson (til vinstri á mynd) tók einnig þátt í 87 km hlaupinu í dag en Þorsteinn Roy Jóhannsson (fyrir miðju) endaði fremstur íslensku karlanna í 45 km hlaupinu í gær, eða í 73. sæti.

Snorri Björnsson kom fyrstur Íslendinga í mark eftir vel útfært, 87 kílómetra hlaup á HM í utanvegahlaupum í Austurríki í dag.

Snorri var í 118. sæti eftir 17,5 kílómetra hlaup en vann sig svo smám saman framar í röðina. Hann var kominn í 54. sæti eftir 53 kílómetra og endaði að lokum í 33. sæti.

Snorri hljóp á samtals 11 klukkustundum, átta mínútum og 17 sekúndum. Sigurvegari varð Frakkinn Benjamin Roubiol en hann hljóp á 9:52,59 klukkutímum.

Þegar þetta er skrifað er Snorri eini af Íslendingunum sem kominn er í mark í hlaupinu. Þorbergur Ingi Jónsson er sem stendur í 88. sæti í karlakeppninni en Halldóra Huld Ingvarsdóttir í 44. sæti af konunum og Rannveig Oddsdóttir í 57. sæti.

Í hlaupinu í dag, sem eins og fyrr segir var 87 kílómetrar, var samanlögð hækkun um 6.500 metrar. Í gær kepptu átta Íslendingar í styttri vegalengdinni á HM, eða 45 km hlaupi með 3.100 metra hækkun.

Andrea Kolbeinsdóttir náði bestum árangri í gær eða 35. sæti en stefndi mun hærra og var mjög ósátt við sjálfa sig varðandi útfærslu hlaupsins.

Hlaup

Mest lesið


Fleiri fréttir

Sjá meira


×

Mest lesið