Erlent

Mynduðu aftöku óvopnaðs stríðsfanga

Samúel Karl Ólason skrifar
Herforingjaráð Úkraínu segir að hermaðurinn sem var skotinn hafi heitið Timofiy Mykolayovich Shadura.
Herforingjaráð Úkraínu segir að hermaðurinn sem var skotinn hafi heitið Timofiy Mykolayovich Shadura. Herforingjaráð Úkraínu

Yfirvöld í Úkraínu rannsaka nú myndband sem birt var á samfélagsmiðlum í gær sem sýnir rússneska hermenn skjóta úkraínskan stríðsfanga til bana. Vólódímír Selenskí, forseti Úkraínu, heitir því að hermennirnir muni finnast.

Í ávarpi sem forsetinn hélt í gærkvöldi sagði hann að „morðingjarnir“ myndu finnast.

Myndbandið sem um ræðir sýnir hermann standa í grunnum skurði, reykjandi sígarettur. Maðurinn með myndavélina virðist vera að bakka frá honum þegar úkraínski hermaðurinn segir: „Slava Ukraini“ eða „Lifi Úkraína“.

Við það var hann skotinn margsinnis af nokkrum rússneskum hermönnum og sagði einn þeirra eftir á: „Drepstu hundur“.

Nafngreindu hermanninn

Herforingjaráð Úkraínu sagði frá því í dag að hermaðurinn héti Timofiy Mykolayovich Shadura. Í yfirlýsingu segir að myndbandið sýni hvernig „einskis virði morðingjar“ haga sér. Það sýni einnig að markmið Rússa með innrás þeirra í Úkraínu sé að gera útaf við úkraínsku þjóðina.

Þar segir einnig að Úkraínumenn muni ná fram hefndum en það verði gert á löglegan og réttlátan hátt, á vígvöllunum, í dómsölum eða fyrir alþjóðlegum dómstól. Dauða allra úkraínskra hermanna verði hefnt með þessum hætti.

Í frétt BBC segir að forsvarsmenn herdeildar hermannsins hafi sagt að hann hafi týnst nærri Bakhmut í austurhluta Úkraínu þann 3. febrúar. Líki hans hafi þó ekki verið skilað og ekki sé hægt að staðfesta að um Shadura sé að ræða.

Þar er einnig rætt við systur hans sem segist hafa þekkt hann á myndbandinu.

Dmytro Kuleba, utanríkisráðherra Úkraínu, sagði myndbandið sýna enn og aftur að Rússar væru að stunda þjóðernishreinsanir í Úkraínu og kallaði eftir því að Alþjóðlegi sakamáladómstóllinn tæki málið til rannsóknar.

Úkraínumenn hafa lengi sakað Rússa um stríðsglæpi gegn úkraínskum stríðsföngum og þar á meðal um nauðganir, pyntingar og morð. Rússar hafa framið margvísleg ódæði gegn óbreyttum borgurum í Úkraínu.

Í sumar birtu rússneskir hermenn til að mynda myndir af höfði úkraínsks stríðsfanga sem þeir höfðu stjaksett. Aðrir hermenn birtu um svipað leyti myndband þar sem rússneskur hermaður skar undan úkraínskum hermanni og skaut hann svo til bana.

Sjá einnig: Stjaksettu höfuð úkraínsks hermanns

Ráðamenn í Rússlandi sökuðu úkraínska hermenn í nóvember um að hafa tekið skotið rússneska hermenn sem gáfust upp til bana. Úkraínumenn sögðu þá Rússa hafa sviðsett uppgjöf til að ráðast á úkraínska hermenn.

Myndband af vettvangi sýndi hvernig rússneskir hermenn komu einn af öðrum út úr skemmu þar til sá ellefti stökk út og skaut á úkraínsku hermennina. Myndbandið sýndi þó ekki meira en það. Sérfræðingar áttu á sínum tíma erfitt með að segja til um hvað hafði gerst.

Sjá einnig: Uppgjöf varð að blóðbaði

Innrás Rússa í Úkraínu Úkraína Rússland Hernaður

Tengdar fréttir

Tóku eigin málaliða af lífi með sleggju

Rússneskir málaliðar Wagner Group birtu um helgina myndband sem sýndi meðlim hópsins tekinn af lífi með sleggju. Rússneski auðjöfurinn sem rekur málaliðahópinn og tengist Vladimír Pútín, forseta Rússlands, nánum böndum, lofaði myndbandið.

Ár eyðileggingar og hörmunga

Ár er liðið frá því Rússar hófu innrásina í Úkraínu. Á þessum degi í fyrra lýsti Vladimír Pútín, forseti Rússlands, því yfir að Rússar væru að hefja „sértæka hernaðaraðgerð í Úkraínu.

Afmá úkraínska menningu í Maríupól

Undanfarnar vikur hafa rússneskir verktakar rifið fjölda rústa og bygginga í Maríupól. Með brakinu eru lík sem liggja enn í rústunum flutt á brott. Verið er að afmá úkraínska menningu borgarinnar og hafa götur Maríupól til að mynda fengið nöfn frá tímum Sovétríkjanna.

Pyntingar á pyntingar ofan

Rúmum tveimur vikum eftir að Rússar hörfuðu frá Kherson-borg og vesturbakka Dniproár fer frásögnum af pyntingum og öðrum ódæðum rússneskra hermanna í héraðinu fjölgandi. Minnst fimm staðir hafa fundist í borginni og fjórir aðrir á svæðinu þar sem íbúar segja að þeir hafi verið yfirheyrðir, pyntaðir, þeim hafi verið misþyrmt og hótað lífláti.

Beitt­u íbúa Izy­um kerf­is­bundn­um pynt­ing­um

Rússneskir hermenn eru sagðir hafa ítrekað pyntað íbúa Izyum í Úkraínu í þá sjö mánuði sem þeir stjórnuðu borginni. Sameinuðu þjóðirnar hafa skráð markvissa beitingu ofbeldis gegn óbreyttum borgurum og að pyntingar hafi verið beitt með kerfisbundnum hætti.

SÞ: Stríðsglæpir framdir á hersetnu svæðunum í Úkraínu

Nauðganir, pyntingar og einangrunarvistun barna á sér stað á hersetnum svæðum Rússa í Úkraínu, að sögn yfirmanns rannsóknarnefndar Sameinuðu þjóðanna. Vísbendingar hafa fundist um fjölda aftaka þar sem fólk hefur verið skorið á háls eða skotið í höfuðið.

Mest lesið


Fleiri fréttir

Sjá meira


×

Mest lesið