Tilgangurinn með húsnæðisstuðningi ekki að „fita leigufélögin“

Jóhann Páll vildi fá að vita hvort stjórnvöld hygðust ráðast í frekari aðgerðir til að stemma stigu við ískyggilega verðbólguþróun og spurði sérstaklega út í leigubremsu í því samhengi.

„Má þá vænta þess að það komi hingað inn frumvarp um leigubremsu á þessu ári? Að hæstvirtur innviðaráðherra hafi forgöngu um það? Er pólitískur vilji til þess inn í ríkisstjórninni? Að ráðast í alvöru aðgerðir sem tryggja meðal annars að aukinn húsnæðisstuðningur leki ekki bara beint út í leiguverð heldur styðji raunverulega við tekjulægsta fólkið á húsnæðismarkaði?“ spurði Jóhann Páll.

Katrín vísaði þá til þeirra aðgerða sem voru kynnt fyrir áramót í tengslum við gerð kjarasamninga á almennum vinnumarkaði en ein af þeim var að koma á fót starfshópi með aðkomu aðila vinnumarkaðarins sem ætlað er að endurskoða húsaleigulög með það fyrir augum að bæta réttarstöðu og húsnæðisöryggi leigjenda. Sagði Katrín að starfshópurinn myndi skila af sér tillögum jafnt og þétt en treysti sér ekki til að segja hvenær þær myndu líta dagsins ljós.

„Ég held að mörgum hafi hreinlega verið mjög misboðið þegar og nánast á sama tíma og stjórnvöld gripu til þess ráðs að hækka húsnæðisstuðning – sem var þörf aðgerð, bæði til eigenda og leigjenda – að þá heyrðist ekki bara af miklum hækkunum á leiguverði heldur líka gríðarlega háum arðgreiðslum út úr vissum leigufélögum. Þannig að ég vil nú trúa því að það sé vilji til þess hér á þingi, þvert á flokka, til að takast á við þetta. Ég get bara tekið undir með háttvirtum þingmanni að það er auðvitað ekki þannig að við séum að hækka húsnæðisstuðning til að fita þessi leigufélög, það er alveg skýrt.“