Segir verkbann til marks um sturlun

Sólveig Anna segir meðvitaða ákvörðun hafa verið tekna um að fresta boðun verkfalls þann 28. febrúar.

 „Við tókum þá ákvörðun að bíða og sjá hver niðurstaða atkvæðagreiðslu Samtaka atvinnulífsins um verkbann yrði. Meta svo stöðuna, samninganefnd Eflingar fundar í kvöld til að gera það. Ef verkbann er samþykkt þá hefst það um svipað leiti og þessi þriðja lota hefði átt að hefjast. Þá dregst auðvitað upp sú mynd að þau áhrif sem áhrif verkfalla er ætlað að ná fram, minnka verulega. Þannig að við metum stöðuna og sjáum hvað við viljum gera hér í kvöld,“ sagði Sólveig Anna í samtali við Berghildi Erlu, fréttamann. 

Til marks um sturlun

Aðspurð hvort að mögulega verði ekkert úr verkfallsaðgerðum Eflingar, verði verkbann ótímabundið segir Sólveig Anna að ef Samtök atvinnulífsins komast að þeirri niðurstöðu að þau ætli að setja verkbann á tuttugu þúsund meðlimi Eflingar, vinnuafl höfuðborgarsvæðisins, ótímabundið, þá sé það til marks um sturlun.

„Og þá held ég að það sé ekki á endanum stærsta vandamálið sem við eða þetta samfélag stöndum frammi fyrir, hvort það náist samningar eða ekki. Vegna þess að þá erum við með auðvald sem að hefur sýnt að það hefur slitið sig frá samfélaginu, ætlar ekki að lifa innan siðferðismarka hér. Þá vona ég að ekki bara Efling hugsi sig um, ekki bara einu sinni eða tvisvar, um hvað sé mögulega hægt að gera til að tjónka við fólk sem hagar sér með slíkum hætti.“

Hún segir félagsfólk standa á bakvið sig og niðurstöður verkfallsboðunar sýni að fólk er tilbúið að fylgja stefnu forystu Eflingar.

„Staðreyndin er auðvitað sú að það eina sem við höfum verið að reyna að gera er að reyna að ná kjarasamningum fyrir Eflingarfólk. Það er okkar skylda, við höfum verið að berjast, en viðsemjendur okkar, Samtök atvinnulífsins, hafa núna síðan í nóvember, neitað að gera við okkur kjarasamning. Ég held að sú mynd að sem dregst nú upp fyrir Eflingarfólki og öðrum, er að Samtök atvinnulífsins geta ekki, vilja ekki sinna sínum skyldum gagnvart sínum stærsta viðsemjanda.“

Hvaða ályktun fólk vill draga að því vill ég ekki segja til um, en ég veit að félagsfólki Eflingar er ekki bara misboðið heldur nóg boðið.

Stjórnvöld ættu að beina orðum sínum til Samtaka atvinnulífsins

Varðandi skilaboð frá stjórnvöldum um ábyrgð deiluaðila um að komast að niðurstöðu segir Sólveig samninganefnd Eflingar hafa farið mjög lausnamiðuð á fundi og fært sig enn nær Samtökum atvinnulífsins. Stjórnvöld ættu því að beina orðum sínum til þeirra.

„Við féllum frá sérstakri framfærsluuppbót, vorum að vinna allar okkar hugmyndir innan ramma kostnaðar Samtaka atvinnulífsins, engu að síður stoði SA upp frá þessu samningsborði og gengu burt. Ef stjórnvöld ættu að beina orðum sínum eitthvað, þá að sjálfsögðu eiga þau að beina þeim til Samtaka atvinnulífsins, því að þeirra er ábyrgðin. Við höfum gert allt sem í okkar valdi stendur til að ná samningum og það er augljóst að það eru Samtök atvinnulífsins sem að vilja ekki gera það.“

Upplausnarástand muni skapast

Varðandi hvaða leiðir hún sjái út úr deilunni á þessum tímapunkti segir Sólveig ljóst að ef Samtök atvinnulífsins ætli að senda tuttugu þúsund félagsmenn Eflingar muni mikið upplausnarástand skapast.

„Fyrir einhverju síðan hefði ég sagt hið augljósa, að við leysum þessa deilu með því að Efling og Samtök atvinnulífsins geri kjarasamning.“

Hún segir að það sé hinsvegar öllum ljóst að Samtök atvinnulífsins vilja ekki og ætla ekki að gera kjarasamning við Eflingu.

„Þetta ólögmæta verkbann sem samtökin ætla sér að setja á er náttúrulega gert til þess að knýja stjórnvöld til að setja lög á deiluna. Hvort það gerist veit ég ekki. Það er enn þá settur ríkissáttasemjari í þessari deilu, hvað hann ætlar sér að gera verður að koma í ljós,“ segir Sólveig. 

Telur þú að hann muni vísa ákvörðun Landsréttar um síðustu tillögu um síðustu miðlögunartillögu ríkissáttasemjara til Hæstaréttar?

„Ég rétt vona ekki, það var gert samkomulag um að það yrði ekki gert. Ætli menn sér að ganga á bak þess væri það auðvitað mikið óþokkabragð."

Hver yrði framhaldið af ykkar hálfu ef það yrði gert?

„Eins og ég segi, ef menn ætla sér að vera svo óheiðarlegir að þeir taki samkomulag sem sannarlega var gert, með aðkomu lögmanna, og kasti því í ruslið, þá auðvitað bara metum við stöðuna ef það teiknast upp."