Mætir með karton af sígarettum í heims­meistara­mót lands­liða í bak­garðs­hlaupum

„Það eru að koma jól mjög snemma í ár. Ég er mjög spennt og stressuð, allt í bland saman,“ sagði Mari Järsk í spjalli sínu sem sjá má í spilaranum neðst í fréttinni. Hún segist ætla að fara „eins langt og líkaminn leyfir,“ en vonast þó til að endast fram á mánudagskvöld. 

„Ég óttast ekki beint neitt en kuldinn, að rúlla svona rosalega lengi í þessum kulda. Kemur bara í ljós. Það er erfitt að kvíða fyrir einhverju sem maður hefur ekki prófað áður.“

„Svo er maður að fara leggja sig í fyrsta skipti, það hef ég ekki prófað áður. Ég reyni kannski að hlaupa einn hring hraðar svo ég nái mögulega að sofna í sjö til tíu mínútur, annars endar maður í ofsjónum og rugli.“

Mari Järsk þakkar vinkonum sínum sem eru liðstjórar hennar fyrir keppni helgarinnar en hver keppandi þarf svo gott sem að mæta með ferðatösku með sér.

„Ég er raunverulega ekki búin að klára [að pakka]. Liðstjórinn minn kemur við í kvöld og fer yfir allt. Ég leyfi mér að vera svolítið heilalaus og vinkonur mínar sjá um allt. Þarf ekki að treysta á sjálfa mig, treysti á þær.“

„Ég ætla að kaupa karton. Það er það eina sem skiptir máli,“ sagði Mari og hló aðspurð hversu mikið af sígarettum hún tæki með sér. Hún nefnilega reykir alltaf milli hringa í hlaupum sínum. 

Bein útsending hefst klukkan tólf á morgun og hlaupinu verður fylgt eftir dag og nótt fram á mánudagskvöld á Vísi og Stöð 2 Vísi.