Fallist á kröfu um einangrun yfir hinum manninum líka

Meintur samverkamaður mannsins var leiddur fyrir dómara í morgun, sama krafa gerð og hún samþykkt. Ómar Örn Bjarnþórsson, verjandi hans, kærði úrskurðinn um leið til Landsréttar.

Ólafur Þór Hauksson héraðssaksóknari segir rannsókn málsins miða ágætlega. Hún sé þó umfangsmikil. Reynt sé að hraða rannsókninni vegna þeirra íþyngjandi aðgerða sem sakborningar í málinu sæta. Annar hefur verið í því sem næst samfelldri einangrun í þrjár vikur en hinn í tvær.

Fjórir menn voru upphaflega handteknir í aðgerðum lögreglu þann 21. september síðastliðinn og voru tveir úrskurðaðir í gæsluvarðhald í kjölfarið, einn í einnar viku og annar í tveggja vikna gæsluvarðhald.

Lagt var hald á tugi skotvopna og þrívíddarprentara í aðgerðum lögreglu en mennirnir eru grunaðir um að hafa framleitt vopn í þeim.

Á fréttamannafundi lögreglunnar í síðustu viku kom fram að í sautján húsleitum vegna málsins hafi verið lagt hald á tugi skotvopna, og þar af nokkur þrívíddarprentuð vopn. Meirihluti vopnanna hafi verið verksmiðjuframleiddur.

Einnig kom fram í síðustu viku af Sigríður Björk Guðjónsdóttir ríkislögreglustjóri hafi sagt sig frá rannsókn á málinu vegna mögulegs vanhæfis. Samkvæmt heimildum fréttastofu var það vegna þess að nafn föður hennar kom upp við skýrslutökur sakborninga hjá lögreglu.