Grunaður um að hafa nauðgað karlmanni á skemmtistað

Fram kemur í ákæru á hendur manninum að hann hafi ruðst inn á salerni á ónafngreindum skemmtistað í miðborginni aðfaranótt sunnudagsins 8. ágúst í fyrra. Þar hafi annar karlmaður verið staddur. Ákærði hafi dregið niður um hann buxur og nærbuxur og reynt að hafa endaþarmsmök við hann án hans samþykkis.

Karlmaðurinn segist ítrekað hafa sagst ekki vilja þetta. Hann hafi reynt að ýta ákærða frá og þegar hann náði að ýta honum frá hafi ákærði farið niður á hnén og reynt að hafa munnmök við brotaþola sem náði að komast út af salerninu.

Í öðrum ákærulið segir að ákærði hafi stuttu síðar farið á eftir karlmanninum inn á salernið, þrýst honum upp að vegg, dregið niður um hann buxur og haft við hann endaþarmsmök án hans samþykkis. Brotaþoli segist ítrekað hafa tjáð ákærða að hann vildi þetta ekki og reynt að komast í burtu.

Þegar honum hafi tekist það hafi ákærði tekið í hönd hans, þvingað hann á hné og látið hann hafa við sig munnmök. Hann hafi ekki hætt því þrátt fyrir ítrekaðar beiðnir þar um auk þess sem hann hafi reynt að slá frá sér. Þá hafi ákærði fróað sér fyrir framan hann þar til brotaþoli hafi komist út af salerninu.

Farið er fram á fimm milljónir króna í miskabætur fyrir karlmanninn, brotaþola í málinu.

Í þriðja lið ákærunnar kemur fram að ákærði sé grunaður um brot gegn lögum um útlendinga. Hann hafi við handtöku um nóttina haft í vörslum sínum falsað ökuskírteini með gildistíma frá 2019 til 2029 og sömuleiðis falsað kennivottorð með svipaðan gildistíma.

Málið er til meðferðar hjá Héraðsdómi Reykjavíkur og er aðalmeðferð fyrirhuguð í mars.