Dró sér þrjár milljónir frá hús­fé­laginu

Konan gegndi embætti formanns húsfélagsins frá september 2017 til maí 2019 en á þeim tíma var hún einnig eini prókúruhafi húsfélagsins. Frá og með septembermánuði 2017 voru húsfélagsgjöldin hækkuð um 5.000 krónur fyrir hverja íbúð, úr 9.000 í 14.000.

Þær breytingar voru aðeins samþykktar af þremur íbúðareigendum í húsinu og var ekki boðað til húsfélagsfundar til að ræða hækkunina. Í dómi segir að óumdeilt sé að þessari hækkun hafi verið ætlað að standa straum af launagreiðslum til konunnar, sem voru 35.000 krónur á mánuði.

Áður en konan tók við formennsku húsfélagsins hafði Eignaumsjón annast reikninga félagsins og höfðu til að mynda greiðslur húsfélagsgjaldanna áður runnið inn á reikning Eignaumsjónar og þaðan inn á reikning húsfélagsins. Eftir að konan tók við störfum sagði hún upp þjónustusamningi við Eignaumsjón, og runnu greiðslur húsfélagsgjaldanna þá beint inn á annan reikning húsfélagsins og gat þannig enginn fengið yfirlit af reikningi húsfélagsins nema í gegn um konuna.

Í dómi kemur fram að konan hafi greitt sjálfri sér samtals 735 þúsund krónur í laun á þeim tæpum þremur árum sem hún var formaður húsfélagsins. Þá hafa greiðslur upp á 2.101.218 krónur verið raktar til konunnar af reikningum húsfélagsins og eiga þær greiðslur sér engar skýringar.

Konunni var bolað úr embætti í maí 2019 en var hún þá búin að kaupa þrjár íbúðir í húsinu.