Hundrað þúsund króna sekt við broti á reglum um PCR-próf

Fyrir viku tóku gildi nýjar reglur á landamærunum sem fela meðal annars í sér að öllum þeim sem koma til landsins verður gert skylt að framvísa nýlegu vottorði um neikvæða niðurstöðu PCR-prófs fyrir brottför til Íslands.

Sóttvarnayfirvöldum þótti rétt að gefa fólki ráðrúm til að bregðast við nýju reglunum og var ákveðið að fyrst um sinn yrði ekki sektað fyrir brot á reglum um PCR-próf. Síðdegis tók ríkissaksóknari ákvörðun um að sekt við brotinu muni nema 100 þúsund krónum.

Arngrímur Guðmundsson aðstoðaryfirlögregluþjónn flugstöðvardeildar telur að reglugerðin verði innleidd að fullu af hálfu löggæsluyfirvalda á næstu dögum þar sem fólk verður sektað ef það getur ekki framvísað nýlegu PCR-prófi.

Upphaflega átti sektin að nema 50 þúsund krónum en hefur verið hækkuð upp í 100 þúsund krónur. Hér má nálgast uppfærð sektarfyrirmæli ríkissaksóknara vegna Covid-19 sem birt voru síðdegis.