Tölvu­á­rás gerð á norska þingið

Umfangsmikil tölvuárás hefur verið gerð á norska þingið þar sem tölvupóstsreikningar fjölda þingmanna hafa verið hakkaðir.

Marianne Andreassen, framkvæmdastjóri skrifstofu þingsins, segir í yfirlýsingu að mjög alvarlega sé litið á málið og að verið sé að kortleggja árásina og mögulegt tjón.

NRK segir frá því að svo virðist sem að tölvuþrjótarnir hafi hlaðið niður ýmsum gögnum eftir að hafa brotist inn í tölvupóst „lítils fjölda þingmanna og starfsmanna þingsins“. Búið sé að hafa samband við viðkomandi starfsmenn.

Alls eru 169 þingmenn á norska þinginu, Stortinget.