Aldrei meiri samdráttur í umferðinni

Umferð á höfuðborgarsvæðinu dróst saman um 21 prósent í mars samanborið við mars í fyrra. Þá var samdráttur mestur við Mýrdalssand eða 52,3 prósent.

Ljóst er að samkomubann vegna COVID-19 faraldursins er að hafa gríðarleg áhrif, að ógleymdum ferðatakmörkunum sem hafa nánast alveg komið í veg fyrir að ferðamenn komi til landsins.

Höfuðborgarsvæðið

Mesti samdráttur umferðar á höfuðborðarsvæðinu hingað til hefur var 9,1 prósent. Það var í apríl 2009 borið saman við sama mánuð árið á undan. Munurinn þá skýrðist af efnahagshruninu seint á árinu 2008.

Mestur varð samdrátturinn á höfuðborgarsvæðinu á Hafnarfjarðarvegi, rúm 27%. Umferð dróst minnst saman um Vesturlandsveg, um tæp 18%. Meðal sólarhringsumferðin um mælisniðin þrjú var tæpum 35 þúsund ökutækjum minni en í sama mánuði í fyrra. Talningin um sniðin í mars í ár jafnast á við mars 2014.

Hringvegurinn

Samtals dróst umferð um Hringveginn saman um 24,4%. Mestur varð samdrátturinn við Mýrdalssand, 52,3%.

Samdrátturinn á einstaka mælistöðum var frá 16,6% við Úlfarsfell og upp í áðurnefnd 52,3% á Mýrdalssandi. Umferð um Hringveginn í mars í ár er um það bil mitt á milli mars mánaðar 2015 og 2016.