Erlent

Fyrsta sprenging í Ilulissat að nýjum alþjóðaflugvelli

Kristján Már Unnarsson skrifar
Teikning af nýja flugvellinum í Ilulissat.
Teikning af nýja flugvellinum í Ilulissat. Grafík/Kalallit Airports.

Grænlendingar eru byrjaðir á gerð 2.200 metra langrar flugbrautar við bæinn Ilulissat, sem verður alþjóðaflugvöllur númer tvö á eftir Nuuk í uppbyggingunni. Kim Kielsen forsætisráðherra hóf verkið með táknrænni fyrstu sprengingu á miðvikudag við mikinn fögnuð viðstaddra.

Sjá fyrstu sprengingu í fréttum Stöðvar 2.

Frá fyrstu sprengingu. Núverandi flugstöð í Ilulissat sést fjær til hægri.Anguteeraq Therkelsen/Inuplan, Ilulissat.

Þetta var þó aðeins viðhafnarsprenging. Eiginlegar framkvæmdir fara ekki á fullt fyrr en í apríl í vor á vegum danska verktakans Munck Gruppen.

Flugvöllurinn á að vera tilbúinn til notkunar haustið 2023 en hann leysir af hólmi núverandi flugbraut, sem er aðeins 850 metra löng og skammt frá. Ilulissat er einn af áfangastöðum Air Iceland Connect á Grænlandi. 

Myndband frá flugvallafyrirtæki Grænlendinga sýnir hvernig nýi flugvöllurinn mun líta út.

Grafísk mynd af flugvellinum í Ilulissat eftir stækkun. Ef grannt er skoðað sést að Grænlendingar gera ráð fyrir flugvélum frá Icelandair og Air Iceland Connect.Grafík/Kalallit Airports.

Ilulissat, sem áður hét Jakobshavn, er við Diskó-flóa og þriðji stærsti bær Grænlands, með um 4.500 íbúa. Hann er vinsælasti ferðamannastaður landsins og stendur við Ísfjörðinn, sem er á heimsminjaskrá Sameinuðu þjóðanna. Fjörðurinn er frægur fyrir skriðjökul í botni hans, en frá honum berst óvenju mikill fjöldi ísjaka til sjávar.

Fyrir áratug byggðu íslenskir verktakar undir forystu Ístaks 23 megavatta vatnsaflsvirkjun utan við Ilulissat, sem sér bænum fyrir raforku. Virkjunin var í alútboði og hönnuð af íslenskum verkfræðistofum.

Sjá hér: Íslendingar í klakahöll undir Grænlandsjökli

Flugvellirnir í Nuuk og Ilulissat fá báðir 2.200 metra flugbraut en auk þess verður nýr flugvöllur með 1.500 metra braut lagður í Qaqortoq.Grafík/Hafsteinn Þórðarson.

Flugvallagerðin er mesta innviðauppbygging í sögu þessa næsta nágrannalands Íslands. Kim Kielsen hóf verkið í höfðustaðnum Nuuk í október í haust með fyrstu sprengingu að nýrri flugbraut þar, sem einnig verður 2.200 metra löng og leysir af 950 metra langa braut.

Þriðji flugvöllurinn, sem áformað er að klára árið 2023, er ný 1.500 löng flugbraut við Qaqortoq, stærsta bæ Suður-Grænlands. Búist er við að sá flugvöllur taki við hlutverki Narsarsuaq sem aðalflugvöllurinn á því svæði. Jafnframt áforma grænlensk stjórnvöld gerð átta annarra smærri innanlandsflugvalla.

Hér í myndbandinu fyrir neðan má sjá lendingu á stuttu brautinni í Ilulissat úr flugstjórnarklefa vélar Flugfélags Íslands í þætti Stöðvar 2 frá árinu 2012 um framkvæmdir Íslendinga í Ilulissat:

Fréttir af flugi Grænland Icelandair Norðurslóðir

Tengdar fréttir

Verkþekking Íslendinga byggir upp innviði Grænlands

Virkjunarframkvæmdir Ístaks, sem nú standa yfir við Diskóflóa á Grænlandi, skila 6-8 milljarða króna tekjum til íslenskra fyrirtækja. Íslensk verkþekking byggir um leið upp innviði Grænlands og segir orkumálastjóri landsins smíði vatnsaflsstöðva hafa gríðarlega þýðingu. Þetta kom fram í þættinum Ísland í dag á Stöð 2 í kvöld, þeim síðari um störf Íslendinga á Grænlandi, en sá fyrri var í gærkvöldi. Virkjunin við Ilulissat telst kannski ekki stór á íslenskan mælikvarða, hún verður 22,5 megavött eða um fjórðungur af stærð Búðarhálsvirkjunar, sem nú er í smíðum.

Íslendingar í klakahöll undir Grænlandsjökli

Virkjun sem Ístak er að smíða á Grænlandi við Diskóflóa lengst norðan heimskautsbaugs er stærsta verkefni í fjörutíu ára sögu fyrirtækisins. Þar er sennilega sú Íslendinganýlenda sem fjærst er öðrum byggðum bólum í sannkallaðri klakahöll við bæinn Ilulissat. Fyrri reynsla Ístaksmanna af smíði virkjana á Grænlandi réð miklu þegar Orkustofnun Grænlands fól þeim einnig þetta tólf milljarða króna verk, þótt þeir ættu ekki lægsta boð.

Virkjunin gæti breyst í ísklump

Virkjanagöng, sem Ístaksmenn bora á Grænlandi langt norðan heimskautsbaugs, liggja í svo köldu bergi að það virkar eins og frystikista. Það er því raunveruleg hætta á því að virkjunin geti frosið og orðið að ísklumpi. Þetta kemur fram í þættinum Ísland í dag á Stöð 2 laust fyrir klukkan sjö í kvöld en þar verður fjallað um þær miklu áskoranir sem mæta íslenskum verktökum og verkfræðistofum við hönnun og smíði virkjunar skammt frá bænum Ilulissat við Diskóflóa.

Mest lesið


Fleiri fréttir

Sjá meira


×

Mest lesið