Staðfest smit á Indlandi fleiri en milljón

Indland er nú þriðja ríki heimsins þar sem staðfest tilfelli kórónuveirunnar eru fleiri en milljón. Aðeins tvö önnur ríki eru með fleiri greind smit, Bandaríkin og Brasilía, en í Brasilíu eru tilfellin orðin fleiri en tvær milljónir.

Flest tilfellin eru enn í Bandaríkjunum þar sem rúmlega 3,5 milljónir manna hafa greinst með veiruna.

Fjöldi smita í Brasilíu og Indlandi hefur því tvöfaldast á minna en mánuði, þó svo að dánartíðni hefur haldist sú sama í Brasilíu að því er fram kemur á vef breska ríkisútvarpsins. Á Indlandi hafa 25 þúsund látist en óttast er að staðan fari versnandi eftir að veiran fór að berast í smærri þorp á landsbyggðinni.

Um 1,3 milljarður manna býr á Indlandi og er búist við að tilfellum fari fjölgandi þegar afkastageta eykst í sýnatökum. Veiran gæti þó orðið erfið viðureignar þar í ljósi þess álags sem er nú þegar á heilbrigðiskerfi landsins og telja faraldsfræðingar að enn séu nokkrir mánuðir í að faraldurinn nái hápunkti í landinu. Líklegt sé að mun fleiri séu smitaðir en fjöldi staðfestra smita gefur til kynna.

Indverski faraldsfræðingurinn Giridhar Babu segir Indverja mega búa sig undir fleiri tilfelli á næstu mánuðum, enda sé það eðlileg þróun þegar kemur að heimsfaröldrum. Markmiðið verði að vera að koma í veg fyrir frekari dauðsföll og því þurfi að útfæra vel hvernig sjúkrahúsplássum verður ráðstafað til sjúklinga sem þurfa á þeim að halda í ljósi veikleika heilbrigðiskerfisins.